Aruba Tourism Authority ta reafirma su compromiso na Industria Cultural y Creativo

E sector aki ta hunga un rol importante den nos identidad y diversificacion di e oferta turistico.

Como e organisacion encarga cu e pilar principal di nos economia, A.T.A. ta reconoce cu ademas di turismo, e industria cultural y creativo ta uno crucial pa nos pais. A.T.A. ta compromete pa sostene e industria a base di creacion di un fundeshi solido, pa esaki por sigui crece, crea un impacto positivo pa e comunidad, y comparti e rikesa cultural di Aruba cu e bishitantenan.

A.T.A. ta enfatisa cu e colaboracion cu Go Cultura Foundation ta mas cu solamente un aliansa. E ta un esfuerso strategico pa crece y fortifica e Industria Cultural y Creativo. Un aspecto cu A.T.A. a bin ta enfoca riba dje pa varios aña caba. A.T.A. a traha hunto cu Aruba Art Fair, Celebracion Dia di Brazil, SMAC (Carnaval), Fundacion Museonan Arubano (Bon Bini Festival), pero tambe cu artistanan local pa cu emebeyecemento di trapi di Rodger’s Beach cu arte mosaik y cu hopi mas. Tur ta evento- y proyectonan cu ta reconfirma e compromiso di e organisacion pa cu e industria aki. Tur ta enrikese e panorama cultural di Aruba, y ta duna un plataforma pa e artista local y su creatividad sobresali. E meta comun entre A.T.A. y Go Cultura Foundation ta pa formalisa y desaroya e sector cultural y creativo, pa asina sigui contribui na desaroyo sostenibel di Aruba.

A.T.A. ta dedica na empodera e sector cultural y creativo, pa medio di educacion y tambe creacion di un strategia integral basa riba data. E enfoke aki lo yuda guia e industria na un desaroyo sostenibel y lo sigura cu cada paso ta basa riba evidencia solido.

E conferencia di CreActivo ta brinda un oportunidad valioso pa tur artista, innovado, y lider den e industria por sigui desaroya nan talento y habilidadnan unico. Un invitacion ta keda na tur artista, creador, innovado y visionario pa asisti na CreActivo, unda nan lo comparti y conecta segun talento, creatividad, habilidad, perspectiva creativo. Bishita www.gocultura.org pa mas informacion di e conferencia cu lo tuma luga dia 8 y 9 di october.