Aruba Tourism Authority ta introduci ideanan nobo pa aña 2025

E presentacion aki, duna door ATA, den colaboracion cu Deep Focus Agency y Zeno Group, a introduci e mercadeo di strategia pa branding y communication pa e aña venidero.

A lansa e campaña di mercadeo “The Aruba Effect” na aña 2022, cu su enfoke pa haci e invitadonan sinti alegria y contento ora nan pensa y bishita Aruba. Awo ta tempo pa sigui evoluciona e strategia di mercadeo. Aña cu ta bin aki, e campaña nobo ta bay mas leu ainda.

A enfatisa e slogan "FEEL IT, WANT IT, GET IT, PROTECT IT" tur caminda durante e presentacion.

E mensahe aki ta enfoca riba turismo sostenibel, subrayando cu ta importante pa nos bishitantenan tuma responsabilidad pa cuida y respeta e ambiente di Aruba mescos cu nan ta cuida nan cas y pais.

Varios punto importante a resalta den e presentacion, reconociendo di nobo cu e miho atributo di Aruba ta su hendenan amabel y cordial.

Algun di e strategianan nobo cu a  introduci ta:

• Refresca “The Aruba Promise”;
• Mustra e bunitesa natural di Aruba via visual y imagen micro y macro;
• Enfatisa “Masha Danki Culture” como un di e miho atributonan di Aruba, resaltando hospitalidad Arubiano;
• Mustra e campaña resiente "Paradise on Tap", cu a haya reconocemento mundial cu ta enfoca riba awa di Aruba, reconociendo cu e ta un di e mihonan den mundo.