Aruba Tourism Authority (A.T.A.) cu aporte importante na e industria creativo na Aruba
ORANJESTAD - Aruba Tourism Authority (A.T.A.) como patrocinado principal di CreActivo, a sostene Go Cultura Foundation pa crea un conferencia caminda a sirbi como un plataforma pa uni miembronan den di e industria creativo. Pero tambe pa completa metanan y estudionan clave.
A.T.A. ta kere firmemente den aloca fondonan necesario como empuhe pa yuda guia e industria creativo segun esfuersonan colectivo. Durante di e conferencia, CEO di A.T.A. Ronella Croes, a reconoce cu cada industria ta enfrenta desafionan, y e industria di turismo no ta un excepcion, y cu data y investigacion ta yuda pa guia e industria den un era nobo.
Mescos cu e industria di turismo, e ta keda crucial pa captura data y aplica hecho y conocemento den e industria creativo, cu lo yuda na duna sosten solido pa e iniciativa di e Industria Cultural y Creativo.
E sosten di A.T.A. ta inclui esfuerso, hunto cu Go Cultura Foundation, pa colecta y analisa data pa mapa e Industrianan Cultural y Creativo di Aruba. Esaki ta un paso significativo pa dilanti. Cu esaki, nos por identifica cual area di e economia creative ta florece y unda mas atencion ta necesario. E lo permiti pa ahusta e estrategia di desaroyo basa riba evidencia fuerte, asegurando cu ta invertí caminda e impacto lo ta mas grandi. Na termino largo, e crecemento di e sector creativo, lo enrikece e paisahe cultural di Aruba y contribui na un turismo sostenibel y desaroyo economico. Poniendo enfasis riba e importancia di preserva nos cultura y cuida e talento local, ta importante pa tene na cuenta e impacto profundo cu creatividad y autenticidad tin riba e identidad di un comunidad.
Alabes, a conta cu presentacion di Senior Product Specialist di A.T.A. Derchlien Dijkhoff, cu a presenta e importancia y vision di cada proyecto. Proyectonan y iniciativa di ‘Destination Enhancement’ diseña pa crea un balans entre e necesidadnan actual y futuro di nos residente, mientras ta mehora e experiencia di e huespednan y ta stimula interaccion entre e localnan y e huespednan. Nos esfuersonan ta enfoca hopi riba promove y crea experiencianan educativo cu ta resalta nos cultura, e proteccion di nos flora y fauna, y tambe door di apoya y demostra experiencianan autentico.
E conferencia a conta cu diferente orador local y internacional cu a aporta inmensamente na e contenido y informacion clave cu a comparti.
A.T.A. ta gradici y felicita Go Cultura Foundation pa un bunita iniciativa dirigi na e comunidad creativo di Aruba.