Aruba Tourism Authority a cende mecha di parada di flambeu

Un tradicion cu ta sirbi como un herencia cultural vibrante di nos isla. Como parti di strategia general, ATA ta duna hopi balor na eventonan social, cultural y recreativo, reconociendo nan como elemento pa mehora e experiencia di tanto residente como nos huespednan.

Ta considera Carnaval di Aruba como un di e eventonan cultural di mas grandi di nos isla. Un evento cu ta ofrece un experiencia unico y cu ta duna nos comunidad un oportunidad pa demostra nan creatividad sin limite cu vestuario y musica. Un evento cu ta uni nos comunidad, y ta invita nos huespednan pa uni y promove un imagen positivo di e oferta cultural autentico di Aruba.

ATA ta fungi como un promotor internacional pa Carnaval di Aruba desde su origen. Uzando diferente canal di mercadeo, cu ta inclui feria y eventonan internacional, ATA ta percura pa expone e magia di Carnaval na e audiencia rond mundo, garantisando su reputacion como un di eventonan di mas importante pa e isla.

Desde cu Stichting Maneho di Aruba Carnaval (SMAC) a tuma maneho di Carnaval over na 2014, ATA orguyosamente a fungi como un patrocinador oficial. Prome cu SMAC, ATA tabata duna sosten na e organisacion Stichting Arubaanse Carnaval (SAC). Ambos organisacion cu a y ta cumpli cu criterianan importante di ATA pa sigura transparencia y alineamento di e meta comparti.

Cada aña, ATA ta inverti den Carnaval di Aruba, sosteniendo varios aspecto, manera logistica y infrastructura, patrocinio di eventonan pa promove participacion local y di huespednan.
Nan ta lansa campaña di mercadeo cu ta eleva e visibilidad di Carnaval internacionalmente y esfuersonan colaborativo cu diferente organisacion local pa amplia e narativa cultural di Aruba.