Aruba Ta Uni na e celebracion di Dia di mama tera 2025: cu e tema Nos Poder, Nos Planeta.

E enfoke di e organisacion Earthday.org ta riba e importancia di energia renobabel y e accion colectivo cu nos por tuma pa proteha nos planeta pa futuro generacion tambe por disfruta di un mundo saludabel y menos dependiente di energia fosil. Tambe ta encurasha mas participacion pa accion y conservacion di naturalesa.

'Nos Poder, Nos Planeta' ta un yamada na cada un di nos pa uza nos influencia – como individuo, den nos comunidad, y den gobernacion pa sostene un transicion urgente y husto na un futuro di energia renobabel/duradero. 

Aruba ta conoci pa su naturalesa unico y ta reconoce e urgencia pa atende e topico di cambio di clima y pa promove practicanan sostenibel. Aunke con chikito e accionnan por ta, contribucion di cada un di nos ta yuda.

Durante Dia di Mama Tera 2025, diferente organisacion lo enfoca riba e miho practicanan y consehonan y ta organisa actividadnan pa conscientisa y stimula accion. 

E accionnan aki por encera:

• Haci limpi den area di naturalesa: Boluntarionan ta uni pa haci limpi nos beachnan, parkenan y areanan natural cu ta frecuenta hopi. Probecha e temporada di campamento 2025 pa uni e grupo di famia y amigonan pa haci y tene e area limpi di sushedad.
• Plantamento di mata: Iniciativanan pa planta mas matanan local pa fortifica nos ecosistema. Riba e pagina di DNM di Facebook por haya tur e sortonan di mata protegi pa leynan local. Pero por planta otro mata tambe manera, mata di seida (cuminda pa parha), mata di fruta of berdura. DNM ta encurasha comunidad pa sali busca matanan grandi y midi esakinan, asina ta aporta na e encuesta “midi nos matanan” riba nan website. E proposito ta pa registra nan pa protehe nan como matanan monumental cu balor halto den nos naturalesa.
• Tayer y/of presentacion educativo: Por busca un podcast cu sesionnan informativo tocante energia renobabel, conservacion di awa, reducion di desperdicio, y otro topico di sostenibilidad. Ta invita bo pa sintonisa nos podcast “Cadushi ta zona cu Dyrick” cu ta transmito cada pasa 2 siman riba diahuebs. Sintonisa esun di e siman aki cu invitadonan sra. Olinda Rasmijn ex presidente di Stimaruba y sr. Pancho Geerman di Museo Arkeologico.
• Exposicionnan di producto y servicio sostenibel: Tin negoshinan local cu ta ofrece alternativa ecologico y tin productonan alternativo cu ta sostenibel. Considera uza un copi reuzabel ora di busca bo copi koffie di tur mainta. Corda uza e tasnan di compra reusabel.
• Campaña di conscientisacion riba media social: Pone un publicacion cu ta promove   hende comparti nan compromiso y accionnan pa un planeta mas saludabel uzando e hashtag #DiaDiTeraAruba, #NosPoderNosPlaneta #ourpowerourplanet #earthaccionday. Tuma un accion, saca un potret  y publica riba bo plataforma social preferi y uza e hashtagnan.

Aruba ta compromete na un futuro duradero berde y ta traha activamente na diversificacion di e economia pa  reduci e dependencia riba combustibel fosil. E celebracion di Dia di Mama Tera 2025 ta un oportunidad pa reafirma e compromiso aki y pa encurasha participacion di tur sector di nos comunidad. Nos ta invita comunidad den e celebracion aki y yuda plama e mensahe di 'Nos Poder, Nos Planeta' na henter Aruba.