Aruba ta traha hunto cu UN-ECLAC pa stimula e sector di Fintech.
ORANJESTAD - Recientemente, Gobierno di Aruba a firma un acuerdo cu Comision Economico di Nacionnan Uni pa Latinoamerica y Caribe (UN-ECLAC).
E colaboracion aki lo focus riba traha hunto pa trata tur aspecto pa sostene crecemento economico, pero mas specifico pa explora e mundo di oportunidad di Fintech, tecnologia di blockchain y cryptocurrency.
UN-ECLAC ta traha pa sostene desaroyo economico den Latinoamerica y Caribe pa fortalece e relacion economico entre paisnan y cu otro nacion di mundo. Ministerio di Asunto Economico, Comunicacion y Desaroyo Sostenibel lo traha hunto cu UN-ECLAC pa compronde e oportunidad- y desafionan den e sector di Fintech. UNECLAC lo haci investigacion detaya riba posicion di Aruba den e sector di Fintech. Lo studia e riesgo, oportunidad y impacto di tecnologia di blockchain y cryptocurrency riba nos economia. Esaki lo yuda Aruba tuma decision informa pa implementa maneho mas faborabel.
Aruba a identifica Fintech como un area clave pa crecemento y diversificacion economico y kier uza e tecnologianan nobo pa duna nos economia un impluso y adapta na e cambionan den comercio global. E investigacion aki ta crucial pa tuma decision strategico pa futuro di Fintech y e sector financiero den Aruba.
