Aruba ta ricibi prestigioso premio ‘Internet Archive Hero Award’

Internet Archive ta reconoce cu e premio aki e trabao haci di e plataforma digital innovativo di Coleccion Aruba.

Internet Archive ta un biblioteca digital gratis cu ta archiva documentonan di World Wide Web y ta haci esakinan accesibel pa tur hende rond mundo. E ta un di e bibliotecanan digital mas grandi y mas significante mundialmente y ta contene un variedad amplio di informacion y material manera buki, website, video, musica y hopi mas.

Tur aña Internet Archive ta otorga e prestigioso premio‘Internet Archive Hero Award’ na esnan cu a demostra liderato excepcional den haci informacion disponibel digitalmente rond mundo. Internet Archive a reconoce e esfuersonan innovativo di Aruba den pone su herencia cultural online via Coleccion Aruba y a nombra Pais Aruba como e ganador di e ‘Internet Archive Hero Award’ e aña aki.

Coleccion.aw ta un plataforma cu ta brinda e usuario informacion tocante nos historia y cultura y ta un plataforma digital crea pa Biblioteca Nacional Aruba, Archivo Nacional Aruba, UNOCA, Museo Arkeologico Nacional Aruba, Stichting Monumentenfonds, Plantage Zorg en Hoop y demas organisacion gubernamental y no-gubernamental. E premio aki ta un gran estimulo pa sigui traha riba preservacion di nos cultura y historia.

Pronto Minister di Finansa Cultura Xiomara Maduro hunto cu representantenan di Bibioteca Nacional Aruba y Archivo Nacional Aruba lo ta presente na e celebracion di Internet Archive na San Francisco, California pa ricibi e prestigioso premio di Internet Archive Hero Award.

Por lesa e anuncio cu Aruba ta Ganado di e Internet Archive Hero Award riba https://blog.archive.org/2024/10/07/aruba-to-receive-2024-internet-archive-hero-award-for-groundbreaking-digital-heritage-initiatives/