Aruba ta anfitrion di e German-Caribbean Energy Conference pa di cinco aña

Na 2017 un delegacion di Duits-Nederlandse Handelskamer a acerca Gobierno pa organisa e conferencia di energia aki na Aruba y desde su comienso, tur aña a organisa esaki na november. E delegacion ta consisti di un grupo di experto comercial, cu ta interesa y entusiasma pa haci negoshi na Aruba.

Cambio climatico ta un menasa, specialmente pa e islanan chikito manera Aruba, mirando cu e tin su efectonan riba economia, pero mas importante, riba e beachnan, e coralnan, y e ecosistema cu ta di hopi balor pa e turistanan, cu ta e curason di nos pais.

Aruba su experiencia directo di e efecto di cambio climatico ta subraya e consecuencianan devastador. Gobierno ta reconoce e riesgo di Aruba su dependencia riba "fossil fuels" y ta comprometi pa cana e caminda pa energia transicional.

Gobierno ta visualisa e transicion energetico como algo mas cu politica di infrastructura, sino como un transformacion social cu ta profundamente hinca den e soñonan y speransa di cada cuidadano. Den aliansa cu e metanan di desaroyo sostenibel di United Nations, Aruba lo adopta un enfoke holistico pa progreso. Cada iniciativa pa yega na energia limpi, cada esfuerso di conservacion, y cada esfuerso pa reduccion di carbon, ta crea caminda pa un futuro sostenibel.

Gobierno ta gradici Duits-Nederlandse Handelskamer pa a kere den Aruba, den tempo bon y den tempo menos bon, organisando e conferencia aki pa di 5 biaha.