Aruba a celebra un bunita Acto Protocolar riba Dia di Betico

Den presencia di dignatarionan, invitadonan y Su Excelencia Gobernador Alfonso Boekhoudt y su distinguido esposa, Himno di Aruba, interpreta pa Jorienne Angela, a resona riba plasa Betico dunando inicio na e ceremonia protocolar.
Pastor Toti F. Fuentebella a haci un oracion y bendicion pa despues Minister President Evelyn Wever-Croes hiba un discurso pa recorda e estadista Arubano y su legado, e trayectorio impresionante di Betico Croes y e stimacion pa su isla natal cu a sirbie como motivacion absoluto den su lucha pa logra Status Aparte.

E programa a sigui cu canto, poema y baile; e hoben J-Vyon Besselink a declama un poesia “Ta E ta Betico”, cual ta skirbi pa George Winterdaal. A continua cu un baile di grupo Mini y Pre-Teen Chaz Dancers bao direccion di Chastity Kock- Hodge cu a presenta riba ritmo di e cancion titula "Betico” di Ronny Kock.

Despues a sigui cu e acto di ofrenda floral na unda Parlamento di Aruba, Gobierno di Aruba, Famia Croes, Fundacion Betico Croes y Asociacion di Consulnan na Aruba a pone krans na e estatua di Betico.

E mainta a continua cu dos cancion nobo composita pa Edseline Figaroa y aregla pa Rigel Isabella. Lizienne Webb a presenta e prome cancion titula “Danki na Dje”, mientras Jetzenia Martines a estrena e segundo cancion titula "No tin nada pa kibr'e".

Minister di Cultura Xiomara Maduro ta gradici tur invitado pa nan presencia, specialmente e yiunan y nietonan di Betico, pero tambe a gradici Comision Celebracion Dianan Nacional pa nan valioso contribucion pa e celebracion aki.