Esaki ta di dos localidad di dokter di cas opera pa Horacio Oduber Hospital (HOH) y e di dos habri e aña aki. Cas di dokter na Piedra Plat lo reenforsa e prome liña di cuido y trece mas accesibilidad na nos pashentnan cu mester di e cuido y lo amplia e capacidad pa sirbi mas pashent. 

E ocasion special aki ta significa un paso padilanti den Ministerio di Salud Publico su compromiso pa mehora e calidad di servicio di cuido di salud disponibel riba nos pais. Den aña 2023 a firma un acuerdo di cuido, cual un di e temanan importante tawata pa reinforsa e prome liña di cuido.

Maneho di Ministerio di Salud Publico ta basa ariba haci inversionnan continuo den cuido y pa sigui investiga con pa mehora e calidad di cuido y sevicio na Aruba y alabes percura pa e fondo di AZV keda sostenibel. Ministerio di Salud Publico su enfoke ta ariba e conscientisacion di prevencion den salud y pa es motibo cu e apertura di HOED na Piedra plat lo tin 3 dokter di cas pa ofrece un servicio adicional. E cas di dokter na Piedra Plat lo percura pa duna un servicio mas accesibel,  efectivo y  eficiente pa nos aseguradonan. 

Minister di Salud Publico Dangui Oduber ta gradici ful e team di HOH y AZV pa e bon trabou, dedicacion y contribucion di cada trahado. Hoed Piedra Plat su compromiso ta pa asegura cu cada pashent cu pasa door di e portanan lo ricibi e miho servicio y trato medico, cual ta alinea perfectamente cu e vision di ministerio di salud, pa asina Aruba ta pais mas inclusivo, innovativo y avansando den servicio di cuido.