ANA cu conexion rapido di internet cu ta facilita digitalisacion y conservacion di documentacion historico

Asina ANA por dispone di conexion rapido di internet cu ta facilita e trabounan di digitalisacion, conservacion y accesibilidad di documentonan y videonan cu ta contene e historia di Aruba, riba www.coleccion.aw.

ANA ta forma parti di e plataforma ‘Coleccion Aruba’ den cual varios instancia na Aruba ta coopera cu otro pa haci nan informacion den forma digital accesibel via www.coleccion.aw. E conexion rapido di internet lo yuda ANA pa na un forma mas lihe digitalisa documentacion historico haciendo uzo di Transkribus, cu ta un programa cu ta uza Inteligencia Artificial pa lesa ‘handschrift’ den documentonan historico. Hunto cu esaki e proceso pa ‘upload’ informacion digitalisa riba internet via Archive.org, cu ta server cu ta haci www.coleccion.aw accesibel riba internet, tambe ta bira mas eficiente.

ANA a logra pone 140.000 obheto historico ariba www.coleccion.aw y awo cu un conexion di internet mas rapido, ta spera cu den algun siman lo surpasa 150.000 obheto. Pa fin di aña 2024 ANA lo por surpasa 200.000 obheto cu ta contene informacion historico riba www.coleccion.aw.

E cooperacion entre SETAR NV y ANA, ta yuda cu e conservacion y accesibilidad di Aruba su herencia cultural y ta muestra di SETAR NV su compromiso pa aporta pa tene cultura di Aruba bibo.