Alerta pa noticia y imagennan falso riba media social
ORANJESTAD - Recientemente por a nota riba media social na Aruba varios publicacion di noticianan falso y material di deepfake ta circulando. Ultimamente, Servicio di Siguridad Nacional di Aruba (VDA) a detecta un aumento grandi den noticianan falso y material manipula (deepfake), cu ta uza pa trata di engaña nos comunidad.
Un di e formanan mas comun ta via fraude cu crypto, unda ta convence personanan pa haci inversion y despues ta perde nan placa.
Gobierno tin e responsabilidad di proteha e comunidad contra e tipo di abuso aki. P'esey ta pidi comunidad pa keda alerta y sigui algun paso importante y recomendacionnan di VDA.
Con pa reconoce noticianan falso y deepfake
- Controla unda e noticia ta bin. Un solo fuente no ta suficiente. Verifica e informacion den media confiabel y oficial prome cu bo kere of comparti.
- Paga tino na e imagen of video. Deepfake por parce real, pero tin detayenan straño, manera movecion no natural of audio cu no ta cuadra.
- Mira si otro media confiabel a publica e noticia. Si un noticia no ta confirma pa instancianan oficial, ta miho bo no confia.
- Uza hermentnan di verificacion. Imagen of video ta facil pa manipula. Uza un "reverse image search" pa verifica si nan ta autentico.
- Tene cuidow cu oferta di inversion. Scammers ta hopi creativo pa trata di saca placa for di hende. Nunca inverti sin investiga bon prome.
Con bo por proteha bo mes?
- No comparti bo informacion personal cu persona of organisacionnan desconoci.
- Si bo topa noticianan sospechoso, raporta esaki na VDA (11911) of Polis di Aruba (KPA 11141).
- Keda informa y sigui e campañanan di siguridad digital pa bo sa con pa detecta fraude.