Agricultura

Banda di e limitacionnan climatologico, e tera pa agricultura ta chikito y fragmenta. Uzo di mashin ta limita y agricultura ta mas tanto pa consumo propio. E terenonan mas adecua ta keda den e renchi hancho rond di Oranjestad te cu e construccionnan na Noord y Santa Cruz, unda cu e presion di e ciudad ta mas grandi tambe. Mientras tanto a construi cas riba un gran parti di e terenonan adecua pa agricultura. E hecho cu no tin suficiente bon tereno pa agricultura ta un obstaculo importante den e sector aki. 

Na Aruba ta permiti pa uza huurgrond pa planta y cria bestia. Den total tin mas o menos 700 parcela pa tempo indefini (mas o menos 8 km2) y 1648 pa tempo defini (mas o menos 8 km2). Cu esaki mas o menos 9% di tereno na Aruba ta huurgrond. Segun Kadaster tin mas o menos 60 tereno na Aruba riba cual permanentemente ta planta of cria bestia. Banda di Butucu cerca di Parke Nacional tin un concentracion di agricultura y cria di bestia. E resto ta plama. 

Tempo cu a lanta Directie Landbouw, Veeteelt en Visserij en Markthallen/Santa Rosa  como un departamento di teritorio insular di Aruba, un di e prome tareanan tabata pa cumpra mashin pa planta y ara tera. Ta huur e mashinnan pa un tarifa abou na e agricultornan. Specialmente na cuminsamento di temporada di yobida Santa Rosa ta haya hopi peticion pa prepara e cunucunan pa planta diferente sorto di mata.

Por haya mas informacion tocante:

• Servicio pa prepara tereno pa planta;
• Informacion di mata tipico y naturalesa;
• Benta di mata original di Aruba;
• Benta di mest, pesticida y material;
• Dunamento di subsidio riba awa;
• Promove salud di mata;
• Benta di simia di berdura y mata di fruta;
• Entrega awa pa irrigacion
• Conseho y guia den proyecto di agricultura.

Cria di bestia extensivo ta consisti principalmente di cria di cabrito. Specialmente pa mehora e rasa di bestia local, a laga importa varios bestia chikito di rasa.

Por haya mas informacion di:

• Servicio di rasa cu chubato y carne di pura rasa
• Cuido adicional di animal
• Benta di bestia pa cria y pa mest di bestia chikito local

Pa cria bestia na un forma economico, cuminda barata ta un condicion, pero lastimamente esaki ta limita na Aruba. Importacion di producto di bestia tambe lo por bira mas economico. Door di tur e limitacionnan, e balor economico di e sector agrario na Aruba ta hopi chikito. Tur wowo ta dirigi riba Commission Sustainable Food Supply cu pa e proyecto di Nos Aruba 2025 ta buscando un forma pa amplia e base di produccion agrario.

Veld di aloe

E veldnan di aloe ta un parti importante di e historia cultural di Aruba, si considera cu mas o menos un tercera parti di Aruba antes tabata planta cu aloe. Aruba tabata un di e productornan mas grandi di aloïne, un substancia den juice di aloe y cu ta un componente natural y esencial pa diferente producto efectivo pa laxante. 
Aloe Vera ta e unico mata cu ta wordo uza pa meta comercial. Na Hato ta cultiva y procesa Aloe Vera den producto cosmetico (Aruba Aloe). E historia, cultivo y e procesamento tambe a bira un atraccion turistico.
Punto di salida ta pa conserva e sector agrario existente. Agricultura y cria di bestia ta forma parti di cultura Arubiano y tereno pa agricultura ta un factor importante den e desaroyo di paisahe den teritorio nacional. Ta deseabel pa tin bon tereno disponibel pa agricultura pa e sector agrario. Specialmente e terenonan rond di e tankinan mester ta destina pa agricultura. Hopi huurgrond no ta wordo uza tur ora pa agricultura; algun di nan ta bandona y di otronan ta ser uza pa construccion.