Agencia di Credit Rating, Fitch Ratings ta na Aruba
ORANJESTAD - E Agencia di Credit Rating Americano Fitch Ratings, ta na Aruba pa evalua Aruba su economia y finansa publico.
E reputacion financiero di un pais ta importante debi cu esey ta locual inversionistanan ta evalua na momento cu nan opta pa deposita nan confiansa den e pais. Pa sa con Aruba ta para financieramente, cada aña Aruba ta haci uzo di companianan di rating renombra manera Fitch y tambe Standard & Poors.
E siman aki e compania Fitch Ratings ta na Aruba pa evalua y duna nan opinion riba Aruba su economia y finansa publico. Ehecutivonan di Fitch Ratings lo reuni cu varios persona y instancia pa nan por forma nan opinion obhetivo. E prome reunion tabata cu Minister Maduro di Finansa hunto cu e ekipo di Departamento di Finansa, na unda a brinda un presentacion extenso riba e ‘performance’ di Aruba su economia y a comparti cifranan di finansa publico di nos Pais.
E aña aki ya ta 25 aña cu Aruba ta trahando cu e compania Fitch Ratings, un hecho pa cual Minister Xiomara Maduro ta agradecido na e ehecutivonan di Fitch Ratings pa nan servicio y trabao dedica na e bienestar di Aruba.
