A reconoce Ivan Jansen pa su contribucion na herencia cultural musical di Aruba.

Pa e ocasion special aki, Minister di Finansa y Cultura Xiomara Maduro, a presenta un reconocimento na sr. Ivan Jansen pa su contribucion significante na e herencia cultural musical di Aruba.

Ivan Jansen, ta casa cu Myrna Jansen – Feliciano, ex directora di Aruba Tourism Authority, y hunto cu su yiunan y demas famia y amistad, tabata presenta na e premiere di e documentario.

Den e documentario aki nos ta cera conoci cu e musico Ivan hopi mas di cerca, den cual ta comparti e historia di su carera musical, su conocemento, produccionnan, su contribucionnan na diferente musico/artista local, alabes su logronan local y internacional y e retonan durante su carera musical.

Ivan su CV ta impresionante, Ivan no ta solamente un musico, un guitarista clasico y di jazz, sino tambe e ta productor, compositor, areglista, educador, lider di banda y empresario.
Ivan ta un musico multifacetico cu un cantidad sin fin di habilidad, creatividad y talento.

Ivan ta e prome guitarista clasico profesional di Aruba. Ivan a prepara su mes academicamente y a sigui su estudio di guitara clasico na Colombia y a atende varios tayer na Venezuela. Ademas Ivan a gradua cum laude na Berkley College of Music na Boston, cu ta un di e universidadnan di musica mas prestigioso mundialmente. 

Tambe Ivan ta un guitarista di e genero di Jazz y ta e prome Arubiano cu a incorpora ritmonan di folklore musical di Aruba, den conceptonan harmonico contemporaneo di Jazz for di den añanan 1980. Un ehempel ta e composicionnan di Padu del Caribe y Rufo Wever pa toca riba piano, Ivan a aregla esakinan pa toca riba guitara. Esakinan ta e innovacionnan di Ivan Jansen cu ta bay den historia musical di Aruba.

Ademas Ivan tin su mesun website www.ivanjansen.com riba cual mundo henter por scucha su composicionnan. Hunto cu tur esaki Ivan ta deleita miles di turista den hotelnan cu su musica. Ta remarcabel cuanto Ivan ta stima Aruba y con e ta crea y promove Aruba su musica unda cu e bay. 
Ivan gusta yuda y comparti su conocemento. Ivan ta docente di guitara clasico y electronico na Scol di Musica Rufo Wever. No solamente e ta siña su studiantenan pa bira un bon guitarista pero tambe e ta inculca e amor pa musica folklorico den e hobennan. Ademas Ivan ta prepara su studiantenan pa drenta conservatorio y practica nan carera musical localmente of den exterior.  

Hunto cu tur esaki Ivan a funda un compania pa representa e musiconan y cantantenan y ta yuda promove artistanan jong pa nan progresa  y logra haya contrato pa nan por actua den varios hotel y otro establecimento.

Ivan a toca pa miembronan di e Cas Real Hulandes y a forma parti di varios orkesta sinfonico y presenta den varios concierto local y internacional.  

E documentario aki tabata un soño di Ivan y cu hopi fe y perseverancia a logra realisa esaki cu sosten di Unoca.

Aruba ta chikito riba mapa, pero un bes mas ta demostra cu nos ta grandi na talento. Cu e iniciativa di Ivan aki por inspira mas persona cu tin un historia pa conta, pa traha un documental. Asina nos por laga e historia atras pa generacionnan cu ta bini despues di nos.

Ivan, masha pabien y masha danki pa eleva nos folklore den e nivelnan di mas halto musicalmente.