A honra 3 polis pa nan balentia y esfuerso
ORANJESTAD - Recientemente Altocomisario drs. Ramon Arnhem a yama tres colega di fam Meye, Stamper y Dorothal pa ricibi nan certificado yama “oorkonde” pa nan maximo esfuerso y valentia pero tambe cu a drenta den accion mesora cu firmeza y sin duda.
Tabata den luna di december cu a sosode un incidente na unda un mucha homber a haya problema den lama na Mangel Halto. Aki a despacha e unidad di San Nicolas y esun di Trafico. Prome yega na e sitio tabata e coleganan menciona y mirando e situacion di emergencia a bay mesora den accion y cuminsa cu reanimacion di e mucha homber mientras tabata wardando yegada di ambulance.
Trahando den equipo y bou coordinacion, e polisnan a keda persisti cu nan reanimacion te final.
Despues ambulance a tuma over y a bay hospital cu e hoben, pero lamentablemente a fayece.
Pa e tres polisnan aki tabata un momento dificil di wak un hoben luchando pa su bida pero cu nan accion rapido a purba di tur forma pa reanime sin pensa otro.
Pa es motibo Altocomisario Arnhem ta mira e importancia di duna balor y honra e tres agente policial cu e titulo di mas halto di gratitud cu ta e “oorkonde”. Cu e documento aki ta pone un balor extra den nan carera policial.
Altocomisario Arnhem ta gradici e tres coleganan aki pa nan accion di bay e "extra mile" di brinda yudansa na e hoben mientras ambulance tabata na caminda y purba di tur forma pa duna e hoben un chens mas den bida.