A honra 3 polis pa nan accion relampago contra un sospechoso cu arma di candela

Durante di Parada di Jouvert Morning a sosode un tiroteo net patras di Julio’s Bar na San Nicolas. Na e momento ey tabatin un multitud di persona gosando di Jouvert Morning y pa colmo e parada tabata pasando na momento di e tiroteo.

Aki tabata na unda agente policial Nicholson, de Castro y Phillip a drenta den accion. Tabata momentonan crucial na unda den un par di seconde mester a actua. Pa nan sorpresa e agentenan a topa e sospechoso canando den nan direccion cu arma di candela den man. Den un forma tactico, eficaz y cu firmesa a sa di actua y a pone sospechoso na vloer y na boei mesora.
Mirando e riesgo grandi pa cu e multitud presente, e actuacion policial cu a resulta den e detencion rapido di e sospechoso despues di e tiroteo ta algo di aplaudi.

Pa motibo aki, Altocomisario Arnhem ta mira e importancia pa duna balor y honra e tres agentenan aki cu e titulo di mas halto di gratitud cu ta e “oorkonde”. Cu e documento aki ta pone un balor extra den nan carera policial.

Altocomisario Arnhem ta sigura comunidad cu Cuerpo Policia tey pa mantene nos comunidad sigur.