A aproba salario minimo pa ora cu lo drenta na vigor 1 januari 2025
ORANJESTAD – Recientemente, Conseho di Minister a aproba salario minimo pa ora nobo, despues cu a inicia cu e proceso aki alrededor di dos aña pasa.
E cambio aki ta resultado di hopi analisis y investigacion cu a inicia na 2022 y ta drenta na vigor 1 di januari 2025.
Salario minimo pa ora ta representa progreso importante pa un salario mas husto. Actualmente tur trahado ta cobra e mes un salario independientemente di cuanto ora pa siman nan traha. Cu e implementacion di e salario minimo pa ora, esaki lo garantisa un aumento substancial, mehorando directamente e condicionnan laboral.
Cuminsando 1 di januari 2025, tur trahado cu ta traha 40 ora pa siman lo haya un aumento di AWG. 20.85 cu ta cu un salario mensual di AWG. 2007.05 compara cu AWG. 1986.20. E trahado cu ta traha 45 ora pa siman lo ricibi un aumento di AWG. 271.73 cu ta un salario mensual di Afl 2257.93 compara cu AWG. 1986.20:
E aumento aki no solamente ta pa duna un pago husto pa e cantidad di ora cu a traha, pero tambe pa fomenta condicionnan laboral husto y productivo. E salario minimo pa ora ta permiti tur trahado, specialmente esunnan cu ta traha den mundo di Horeca, por ricibi un pago proporcional na su oranan real di trabou.