99% di abuso sexual di mucha ta sosode den famia of circulo di amistad

Riba prevencion, ehecucion y conscientisacion, Gobierno hunto cu Comision Nacional di Abuso di Menor, organisacionnan y fundacionnan gubernamental y no gubernamental, ya a tuma diferente accion pa yuda preveni y combati e crimen grave aki contra nos muchanan.

Sinembargo, e ta un berdad hopi tristo cu e problema aki ta cuminsa hopi cerca di cas mes di un mucha. Cifra y informacion obteni di casonan di abuso di mucha ta indica cu 99% di casonan di abuso sexual di mucha, ta cometi pa un persona cu e mucha conoce. E por ta un amigo di cas, amiga of amigo di mama y tata, pareha nobo, omo, welo of padrastro. Esakinan ta personanan cu ta cerca di e mucha y kendenan e mucha ta confia. Personanan kendenan a mayornan a confia pa laga nan yiu den nan cuido.

E problema mas serio no ta ley, Gobierno of hues, sino den famia mes. E ta responsabilidad di cada famia, di cada persona cerca di e mucha cu e mucha ta confia. Por cambia tur ley, pero si den famia mes ta bira cara pa abuso di mucha, of sconde esakinan, nos ta sigui faya e muchanan. Hunto so lo preveni y combati e crimen aki contra nos menornan inocente.

Nos mester confronta e berdad aki, aunke cu e ta incomodo y delicado. Sea mas consciente cu kende ta laga e muchanan y reconoce señalnan den e mucha of den esnan cu ta wak pa e mucha. Door di ta consciente, acepta loke ta pasando, y door di accionnan preventivo, nos por traha pa un futuro caminda cada mucha ta crece den un ambiente liber for di e garanan di e abusado. Nos muchanan merece miho.