9 docente a celebra nan hubileo na EPI
ORANJESTAD - Diabierna 14 di februari 2025, Prome Minister demisionario Evelyn Wever-Croes tabata presente na EPI pa celebracion di hubileo di 9 docente di EPI cu ta celebra entre 25 pa 45 aña den e veld di enseñansa na EPI, cu hunto ta conta cu un total di 280 aña di experiencia.
Prome Minister a tuma e oportunidad di gradici cada un di e docentenan aki pa tur e añanan di dedicacion na nos hobennan. E docentenan aki no solamente ta un guia pa e hobennan sino tambe un "role model", cu a sa di tin un influencia positivo riba e exito di cada un di nan. Danki na nan dedicacion y esfuerso awe e hobennan aki ta exitoso. Docentenan no solamente ta guia e hobennan sino tambe ta un ayudo grandi pa e mayornan pa loke ta guia profesional di nan yiunan. Prome Minister a gradici EPI pa tur e sosten cu nan ta duna comunidad den e area di enseñansa.
Por ultimo Prome Minister a referi na e discurso di docente Harrisch Chin Sie Jen, cu ta mustra con chikito Aruba ta. Señor Chin Sie Jen tabata docente tempo cu Prome Minister su casa y su yiu tabata bay scol, y tabata colega di su mama. Aki ta papia di tres generacion, y tur e añanan aki ta muestra di cuanto experiencia sr. Chin Sie Jen tin den e ramo aki. E trabou di esnan den e veld di enseñansa no ta solamente importante sino tambe hopi grandi y bunita, y merece tur clase di respet.