75 pareha internacional y local a renoba nan promesa matrimonial durante ‘Aruba I Do 2024’

Despues di un total di cinco edicion exitoso riba Eagle Beach, a redefini esaki como e renobacion matrimonial mas memorabel den Caribe. E transicion nobo aki, alinea cu e High Value – Low Impact, ta percura pa priorisa e eco-sistema di e isla y ta para como un ehempel pa sigui e regulacionnan nobo pa cu eventonan ariba beach na Aruba.
E aña aki, e evento a bay for di Eagle Beach pa un lugar mas historico, esta Museo Historico Fort Zoutman y asina conmemora e celebracion di 200 aniversario di Oranjestad. Un museo cu a ofrece un atmosfera mas intimo y memorabel na e 75 pareha local y internacional cu a participa e aña aki. Den un ambiente romantico yena di nostalgia, e parehanan a ricibi e oportunidad pa rebiba e momento di mas importante den nan bida matrimonial. 

‘Aruba I Do’ a bira un di e evento mas anticipa pa parehanan di tur parti di mundo, como tambe parehanan local. Na 2023, e evento a atrae un record di 350 pareha, cu a logra posiciona e evento como e renobacion di matrimonio di mas grandi den Caribe.

Cu e cambio signicativo y nobo, por a conta cu un evento mas priva y memorabel caminda cu a provee e oportunidad pa 75 pareha for di diferente pais renoba nan matrimonio, esaki a inclui parehanan di; Merca, Canada, Argentina, Colombia, Chile, Italia, Reino Uni, y Aruba. Entre e parehanan, por a conta cu algun pareha di e comunidad LGBTQ+, cu ta refleha e diversidad y inclusion di e comunidad di ‘Aruba I Do’. Pronto por mira cobertura di ‘Aruba I Do’ riba diferente canal internacional, manera; Despegar Chile, Colombia, Argentina, Mexico, y Brasil, Decolar, The Travelization di Italia, creador di contenido di Merca, y mas.