2024: Desaroyo, progreso y un Aruba mas sigur

Desaroyo y Inversion:

Nos cuerpo ta den pleno desaroyo, nos ta traha cu strategianan clave. Nos ta profesionalisa Cuerpo Policial pero tambe fortalese e calidad di e profesion di polis. Esaki nos ta haci door di inverti den curso- y material nobo. Pero e mas importante ta, dedica tempo den e persona patras di e polis.
E polis, e colega ta nos capital di mas grandi. Nos kier ta un bon doño di trabao na unda e polis por bin trabao cu smaak y na unda e polis ta central. Mescos cu aña pasa nos a haci hopi renobacion den cuerpo policial, nos a hacie e aña aki atrobe. Nos a inverti den auto nobo pa tur departamento den KPA , uniform nobo ta yegando, radio nobo pa cada polis, edificionan nobo y diferente material nobo pa nos Cuerpo. Pero lo mas importante, ta e klasnan nobo di agentenan policial cu ta iniciando.

Criminalidad bahando y Aruba mas sigur:

E aña aki Aruba a conoce solamente un caso di asesinato y compara cu 2023, esaki ta un reduccion drastico. Tin cierto casonan di crimen pisa cu a reduci durante 2024, pero tambe algun cu a mira un aumento recientemente. KPA ta comprometi pa pone man riba e sospechosonan y resolve e casonan debidamente. 
Conclusion pa 2024 ta cu crimen pisa na Aruba a baha compara cu 2023. Den 2023 crimen pisa tambe a baha compara cu 2022.  Esaki nifica cu Aruba ta keda bira mas sigur pa loke ta crimen.

Mester sigui reglanan di trafico mas mihor:

Durante 2024, Aruba a conoce 13 victima fatal den accidente di trafico. Ta notabel cu alcohol y velocidad halto ta un problema grandi den trafico. E uzo excesivo di alcohol a percura pa un catidad grandi di accidente den trafico. Ademas e fenomeno di “Hit and Run” tambe a mira un aumento, hasta den casonan den cual personanan a perde nan bida. Un cantidad grandi di chauffeur ta maneha cu velocidad halto of no ta duna preferencia, pero tambe ta uza celular durante cu ta maneha un vehiculo motorisa.
Accidente di trafico y cantidad di victima fatal den trafico a aumenta den 2024, compara cu 2023. Esaki ta un lastima, mirando cu na 2023 y 2022 a mira un reduccion. Trafico sigur ta un prioridad grandi pa Aruba. Nos lo sigui traha duro pa preveni y pa mira cu esaki baha.

A carga dos evento grandi den 2024

Cuerpo Policial a carga dos evento grandi y importante pa Aruba; Carnaval y Eleccion. KPA a haci lo maximo posibel pa reduci e cantidad di detencion y a enfoca mas riba prevencion pa e temporada di carnaval. Durante Eleccion 2024 na comienso di december, KPA tabatin un bon coordinacion y a haya bon cooperacion cu tur partido politico den contienda. Hunto a mentene ordo publico y no mester a bay over na ningun detencion. KPA kier felicita nos comunidad cu a sa di respeta y comporta debidamente durante e dos eventonan grandi aki.

Aruba pionero den siguridad den caribe:

KPA tin un posicion fuerte riba area di informacion, ta mira y tende hopi cos y por intercepta hopi droga y preveni crimen. Despues di un investigacion internacional a resulta cu Aruba ta hopi sigur den Caribe y ta bon posiciona na unda local y turista por sinti nan sigur. 

Sea e miho version di bo mes:

Crimen no ta paga na Aruba. Keda riba e caminda corecto pa bo mes y pa bo sernan keri.
Error ta humano pero siña di esakinan. Tin varios instancia na unda bo por haya yudansa. Si bo sigui den e bida di crimen, e momento lo yega cu lo detene bo y hiba bo dilanti Hues cu lo determina bo sentencia. No lage yega asina leu.
Korps Chef Ramon Arnhem ta hopi orguyoso pa cu e bon trabao di tur esnan den Cuerpo Policial y ta  sumamente agradeci pa nan esfuerso. Nan ta esnan cu ta haci e diferencia y ta percura pa nos comunidad por drumi sigur riba nos dushi Aruba.