106 detenido na Instituto Coreccional a ricibi certificado
ORANJESTAD - Recientemente, a tuma luga un ceremonia na Instituto Coreccional Aruba (KIA), den cual 106 detenido cu a termina cursonan duna pa Fundacion Enseñansa pa Aruba (FEPA), a ricibi nan certificado.
Como Pais, ta importante pa inverti den e re-integracion exitoso di e detenidonan, cual ta un rekesito di entre otro Comision Europeo di Prevencion di Tortura (CPT) cu ta audit Aruba regularmente.
A traha un plan integral pa haya sa kico ta e cursonan cu por ofrece na e detenidonan, teniendo na cuenta nan propio nivel di educacion y nan interes. Asina a duna curso di small business, basiskennis calculatie en boekhouden, manicure pedicure, conga lessen basico y avansa, sales and marketing y horticultura basico. Cu un certificado den man, e detenidonan tin un miho oportunidad di re-integracion den mercado laboral y sociedad.
Minister di Husticia Rocco Tjon ta gradici Fundacion Enseñansa pa Aruba (FEPA), kende a brinda e diferente cursonan aki na nos detenidonan na KIA.