Cu e maneho aki ta atende e desafionan cu a surgi despues cu Corsou a habri su frontera cu Venezuela mientras cu frontera aereo entre Aruba y Venezuela ta permanece cera. Vuelonan di carga indirecto entre Aruba cu Venezuela lo ta permiti atrobe bao di cierto condicion. Cu e maneho nobo, companianan local ta permiti pa efectua vuelonan di carga desde Venezuela via Corsou, mientras aerolineanan Venezolano tambe por opera vuelonan similar. E prohibicion actual ta keda vigente pa vuelonan directo, incluyendo di pasahero, carga y vuelo combina entre Aruba y Venezuela. Tambe ta keda prohibi vuelo di pasahero cu escala na un di tres pais.

E condicionnan specifico cu ta conta pa vuelonan di carga indirecto a keda estableci den e acuerdo bilateral di

aviacion. E maneho temporario aki ta establece algun regla cu ta guia vuelonan comercial di carga te ora cu frontera cu Venezuela bolbe habri. Vuelonan di Venezuela pa Aruba (of vice versa) cu escala na un di tres pais lo ta limita na un frecuencia di tres biaha pa siman y lo mester cumpli cu condicionnan stipula pa autoridad local of internacional. E maneho interino ta rekeri permisonan comercial cu lo mester otorga mutuamente, conforme e principio di reciprocidad.

Ministerio di Transporte, Integridad, Naturalesa y Asunto di Adulto Mayor lo implementa e maneho aki y conforme decision di Conseho di Minister di Aruba esaki lo permanece na vigor te ora cu frontera cu Venezuela habri. Pa yega na e maneho aki a pidi conseho di Immigracion Aruba, Aduana di Aruba, Directie Scheepvaart, Directie Luchtvaart, Directie Buitenlandse Betrekkingen y Ministerio di Asunto Economico, Communicacion y Desaroyo Sostenibel.

Cu e maneho nobo aki di trafico aereo, gobierno ta señala su compromiso pa mantene siguridad publico, fomenta practica responsabel di aviacion y yuda stimula nos economia.