E delegacion, lidera pa Minister di Turismo y Salud Publico, Dangui Oduber a reuni cu varios ehecutivo di diferente linea crucero y a elabora riba e inversion cuantioso cu ta andando di parti di Aruba Ports Authority (APA) pa loke ta e infrastructura di e puerto crucero na Oranjestad y varios inversion cu ta dirigi na mehora e experiencia di nos bishitante.

Varios ta e companianan crucero cu a confirma un aumento den nan frecuencia di bishita entrante 2024. Esaki ta inclui barconan luhoso manera Seabourn cu ta proyecta di bishita Aruba den 2024 cu 3 biaha, incluyendo un overnight, mientras Royal Caribbean y Norwegian Cruises lo aumenta nan bishita na Aruba cu e barconan mas nobo di nan flota, incluyendo un aumento den e low season.

Ministerio di Turismo y Salud Publico ta haciendo tur esfuerso pa reforsa e low season cu mas bishita crucero y ta spera cu den e medio plaso, un tercer linea crucero por cuminsa opera durante e low season.