Vehiculo
Registracion di vehiculo di motor
Tur hende cu tin un vehiculo di motor propio y cu kier us’e riba caminda publico mester registra e vehiculo di motor na Departamento di Impuesto (DIMP)
Su bo ta e prome doño di un vehiculo nobo, bo tin cu entrega e datonan tecnico di bo vehiculo.
Bo a cumpra un vehiculo segunda mano? E ora ey bo mester entrega un carchi di keur valido. Despues bo ta haya un prueba of recibo di registracion. E prueba of recibo bo mester ward’e hopi bon. E prueba bo tin mester di dje entre otro ora di paga belasting riba vehiculo di motor. Ta recomendabel pa traha un copia y warda esaki na un otro lugar.
Impuesto/belasting di motor
Si bo ta haci uzo di bo vehiculo riba e camindanan publico di Aruba, bo ta obliga di paga anualmente belasting di vehiculo na Departamento di Impuesto (DI). Bo por paga e belasting na comienso di aña den un solo pago; e ora ey bo ta haya e plachi di number y e plachi chiquito (plachi di control). Sinembargo tin e posibilidad pa paga pa mitad aña of pa kwartaal. Na e prome pago bo ta haya e plachi di number y na e ultimo pago e plachi chiquito (plachi di control).
Na e prome pago(nan) bo tin cu entrega e siguiente documentonan:
- Un prueba di seguro valido;
- Prueba di registracion di e vehiculo;
- Eventualmente e prome prueba di pago(recibo) di e aña anterior.
Den caso cu bo no kier sigui uza e camindanan publico na Aruba, bo por entrega bo plachi di number na Departamento di Impuesto (DI). E ora ey bo no ta debe impuesto di auto.
Mas informacion por haya riba e website di Departamento di Impuesto (DIMP).
Keurmento
Ta prohibi pa laga un vehiculo di motor mas bieu cu tres aña para riba caminda publico, of core cun’e riba caminda publico, a menos cu e tin un carchi of prueba di keur y e valides di e prueba di keur no a caduca. Bo por laga keur bo vehiculo di motor na Servicio di Inspeccion Tecnico (Dienst Technische Inspecties (DTI). Si e vehiculo di motor mester bay keur pa di prome biaha, anto bo tin cu mustra e prueba di registracion di e vehiculo di motor di Departamento di Impuesto (DIMP) y un prueba di seguro valido.
Den caso di un vehiculo di motor cu a keur anteriormente caba, e ora ey bo tin cu entrega e prueba (carchi) di keur y un prueba di seguro valido. E prueba di keur tin un validez di dos aña pa loke ta concerni vehiculo di motor ariba mas cu dos wiel y di vehiculo destina pa transporte propio di persona. Y loke ta concerni otro vehiculonan di motor, e prueba di keur tin un validez di un aña, cada ves desde e fecha di entrega di e carchi di keur.
Si bo vehiculo a pasa e keurmento cu bon resultado, bo ta ricibi un recibo y un prueba di keur. Den caso cu bo vehiculo no pasa e keurmento, bo ta haya un recibo di pago pa e keurmento. Bo por bolbe keur (herkeur) bo auto sin costo dentro di trinta dia desde e fecha cu e vehiculo a keda “afgekeurd”.
Den e caso cu bo a perde e carchi di keur of e ta gasta of bo no por les’e mas, bo por haya un duplicado. Como doño di e vehiculo bo tin cu entrega un prueba di registracion di e vehiculo y un prueba di identificacion valido.
Si bo a cumpra un vehiculo, bo mester registra e vehiculo prome riba bo nomber na Departamento di Impuesto (DIMP). Si e vehiculo tin un carchi di keur valido ainda, como doño nobo bo por cera un seguro di auto cu e carchi di keur aki. Cu un prueba di seguro y un registracion corecto di e vehiculo, por pasa e carchi di keur riba bo nomber na e departamento di keurmento di auto na Servicio di Inspeccion Tecnico (DTI). Ta duna un otro carchi di keur ariba bo nomber cu e mesun informacion di keur cu esun original.
Seguro di vehiculo
Si bo kier uza bo auto riba caminda publico bo mester laga segura e auto. Si durante control di trafico bo no por mustra un prueba valido di seguro di auto, bo ta core e riesgo di haya un boet.