Ley di vakantie 1993

E Ley di vakantie 1993 ta aplicabel pa tur trahado cu ta traha a base di un contract di . Por cera un contract di trabao tanto verbal como por escrito. Nabegante, trahado na su mesun cas y yiu di e doño di trabao kende ta biba na cas y kende ta traha pa cuenta di e doño di trabao, no ta ser considera como trahado. Personal domestico tambe ta cay bou e areglo aki.

Derecho riba vakantie

Pa cada aña cu e trahado a traha sin interupcion den servicio di mesun doño di trabao, e trahado tin derecho riba vakantie di por lo menos tres biaha e cantidad acorda di dia di trabao, cu salario.
Si e trahado ta traha por ehempel dos dia pa siman, e ora ey e tin derecho riba seis dia di vakantie, cu salario. Si e trahado ta traha cinco dia pa siman, e ora ey e tin derecho riba diescinco dia di vakantie cu salario. Sinembargo, si e trahado ta traha seis dia pa siman, e ora ey e tin derecho solamente riba por lo menos diescino dia di trabao cu salario.

Atencion: Semper por acorda mas dia di vakantie!

Dunamento di vakantie

Ta duna vakantie preferiblemente sin interupcion. Riba peticion di e trahado of si trabaonan ta permiti esaki, por tuma e vakantie parti. Sinembargo ta duna por lo menos mita di e vakantie pega na otro. E decision tocante ki fecha vakantie lo cuminsa ta bini despues di consulta cu otro, pero e decision final ta den man di e doño di trabao.

Pospone of suspende vakantie

E doño di trabao por pospone e comienso di e vakantie of por suspende e vakantie cu a cuminsa caba, riba peticion di e trahado of pa motibo di interes di e negoshi. Si e doño di  trabao suspende e vakantie pa motibo di interes di e negoshi, e mester compensa e eventual gasto di biahe of estadia cu e trahado a haci pa por pospone su vakantie.

Si e trahado na comienso di su vakantie, no por traha pa motibo di accidente den sentido di e Ley di Accidente na trabao, of e ta malo of a bira malo den sentido di e Ley di Malesa, e vakantie, of e parti di e vakantie cu no a ser tuma ainda, ta ser considera como suspendi.

Perde derecho riba vakantie y caduca dia di vakantie

E derecho riba vakantie durante un aña transcuri ta caduca, si e trahado durante dicho aña a falta trabao por lo menos un total di seis luna pa motibo di malesa of accidente, of el a falta trabao por lo menos un total di seis siman pa motibo di cumpli cu obligacion legal.

E dianan di vakantie cu e trahado a adkiri derecho riba nan, pero cu e no a tuma ainda na momento cu un derecho nobo a surgi, ta ser conta hunto te na un maximo di seis biaha e cantidad di dian di trabao acorda pa siman. E dianan cu pasa e maximo aki ta keda caduca. Por spaar dia di vakantie pa un periodo di dos aña maximalmente. E doño di trabao ta obliga di laga e cantidad maximo di dia di vakantie acumula cuminsa dentro di tres luna despues di e peticion di e trahado, mientras e trahado ta obliga di tuma e dianan di vakantie aki, tambe sin cu e a pidi pa nan. Den e negoshi of compania caminda hende ta traha segun sistema di warda (volcontinudienst), ta conta un plaso di seis luna.

E cantidad maximo di dia di vakantie acumula ta ser otorga pega na otro y no por pospon’e ni suspend’e, excepto ora e trahado ta incapacita na momento cu su vakantie mester cuminsa of si  e trahado ta malo of  a bira malo ora su vakantie mester a cuminsa of durante di su vakantie.

Pago na final di e relacion di trabao

Ora cu e relacion di trabao termina, e doño di trabao lo paga e trahado e dianan di vakantie cu e no a tuma, segun nan balor na placa. Ora di calcula e cantidad di dianan di vakantie, parti di un dia ta conta como un dia completo.

Ta calcula e salario pa dia manera cu ta sigui:

Pa e trahado kende tin un siman di trabao di cinco dia:

• E salario pa ora acorda entre e doño di trabao y e trahado multiplica pa e cantidad promedio di e oranan di trabao semanal di e trahado en cuestion parti door di 5 of;
• E salario pa siman parti door 5 of;
• (E salario pa luna multiplica cu 3) parti door di 65.

Pa e trahado kende tin un siman di trabao di seis dia:

• E salario pa ora acorda entre e doño di trabao y e trahador multiplica pa e cantidad promedio di e oranan di trabao semanal di e trahado en cuestion parti door di 6 of;
• E salario pa siman parti door di 6 of;
• (E salario pa luna multiplica cu 3) parti door di 78.

Tin un foyeto na Hulandes tocante e topico di Vakantie en feestdagen obtenibel.