Tier 2 ranking di US State Department ta nifica cu un pais no ta cumpliendo completamente cu prevencion di

traficacion humano, pero si ta haciendo suficiente esfuerso pa yega na e standard minimo.

Prome Minister a repasa tur esfuerso cu a haci pa por haya e ranking Tier 2. E Coördinatiecentrum Mensenhandel en Mensensmokkel Aruba (CMMA) a bin cu un campaña yama "Habri bo Wowo" pa asina conscientisa comunidad riba e importancia di ta alerta pa e casonan di traficacion di hende. Ta importante pa notifica autoridad si nota cu ta trece personanan na forma ilegal y ta depriva nan di nan libertad, di por drenta y sali ora cu nan kier, si te hasta ora di bay banco tin un hende ta vigila nan, of si nota cu tin auto ta drenta sali cada rato na un cas den cercania, entre otro. Actualmente esaki no ta un problema grandi na Aruba pero mester haci tur esfuerso pa evita pa e bira grandi, principalmente door di preveni.

Aruba a haci hopi inversion, a duna sosten y atencion na nos departamento of coordinatie punt, y a haci esfuerso internacional tambe. Na september 2022, Prome Minister a reuni cu e Deputy Assistance Secretary for Caribbean Affairs di State Department na New York, sra. Barbara Feinstein, y a splike con importante esaki ta pa Aruba, y a solicita ayudo pa evita cu Aruba lo bolbe ricibi e ranking di Tier 3.

Trece hende ilegal Aruba no ta algo permisibel, noble of normal. Esaki ta contra ley, specialmente si ta trece hende y bay abusa di nan. Na Aruba, un di cada 6 persona, ta indocumenta for di Venezuela. Gobierno ta haciendo tur esfuerso pa purba regula esaki y percura cu tur hende tin un bon calidad di bida. Aruba como isla chikito, tin su limitacionnan inclui financiero, pues mester bin cu regulacion.

Prome Minister ta urgi comunidad pa keda alerta y pa ora cu cualkier ciudadano sinti cu tin un caso di traficacion di hende, meld esaki na CMMA di biaha pa nan por actua debidamente. Por haci esaki riba medionan social, cmmaruba of por yama e hotline, 5923231 of na oficina na 5975223 of tambe via email info@cmmaruba.com.

Prome Minister ta gradici señora Jeanette Baars y señora Angela Persad, cu tin pasion pa e trabou aki den CMMA. Nan a sa di carga y mehora e trabou y awor convence US State Department di tur esfuerso cu ta haciendo riba e tema aki.

“Ban haci tur otro esfuerso pa nos por mantene e rating aki pasobra ta masha poco isla den Caribe ta den Tier 2. Nos tin cu considera nos mes hopi dichoso cu esaki y semper traha pa sigui mehora”, Prome Minister Evelyn Wever-Croes a expresa.