BRA pa hopi tempo a expresa e deseo pa Aruba tin e sistema Early Warning System, cu lo yuda anticipa riba calamidad mas tanto posibel. E sistema cientifico aki ta analisa fenomenonan pa asina yega na conclusion y duna aviso trempan di calamidad na caminda. E avisonan aki ta yega tur caminda den tur idioma y forma posibel na Aruba, te hasta ora un persona ta den mondi, y no tin accesibilidad na comunicacion, e tambe por haya e informacion aki.

E sistema ta un guia tambe pa haci e proceso di evacuacion mas facil of pa tuma medida di prevencion. E meta ta pa tin mas siguridad y scapa bida di hende y minimalisa daño pa asina haya e forsa pa recupera bek. Ta haci esfuerso pa logra un Aruba mas resiliente contra cualkier calamidad y awo, a logra cu fondo di Union Europeo, pa esaki bira realidad.

BRA a inscribi na Union Europeo pa por bin na remarca pa e Early Warning System Project y despues di basta burocracia y obstaculo, a logra pa Union Europeo financia 1.7 miyon Euro pa e proyecto aki. Cu adkisicion di e sistema aki, Aruba ta bira un pionero den Caribe, un role model pa otro paisnan den Caribe. Nacionnan Uni ya a stipula cu dentro di 5 aña tur pais den Caribe mester tin un sistema similar y Aruba ta canando adelanta den esaki.

“E echo cu nos a logra esaki, ta bisa hopi di nos. E dedicacion y profesionalismo di BRA y Crisis Team, sigur ta loke a yuda pa haci esaki posibel. “Den nomber di Gobierno di Aruba, y di pueblo en general, mi ta gradici boso pa tur e trabounan cu boso ta haci pa logra esaki. Preparacion ta e miho forma pa sali y recupera di cualkier calamidad”, Prome Minister Evelyn Wever-Croes a expresa.

E Early Warning System, lo ta operacional pa juni 2024, mientras lo ta preparando nos comunidad y duna splicacion necesario pa esaki ta exitoso.

Prome Minister ta gradici BRA pa tur e trabao cu nan ta haci y ta felicita nan pa logra obtene e Early Warning System.