Aruba como parti di Reino Hulandes ta ricibi cooperacion valioso for di e Union Europeo.

Rene van Nes a inicia su bishita cu un reunion hunto cu Minister President, Evelyn Wever-Croes y Minister di Asunto Economico, Comunicacion y Desaroyo Sostenibel Geoffrey Wever, caminda a enfoca riba e importancia pa nos pais keda mantene e relacion di cooperacion cu UE, ricibiendo ayudo financiero pa realisa proyectonan importante pa nos sostenibilidad y futuro.

Un di e puntonan cardinal di e bishita di sr. van Nes ta pa bishita Universidad di Aruba y e area di renobacion di Maria Convent. Aki a observa e avancenan den e trabounan di renobacion riba e edificionan historico, cual den futuro cercano lo fungi como e facultad nobo di STEM na Universidad di Aruba (SISSTEM). E proyecto di renobacion y inversion den e facultad nobo di Universidad di Aruba tin un balor agrega pa Aruba y su educacion.

Sr. van Nes tambe a bishita Fundacion Parke Nacional Aruba, caminda a ricibi informacion di e proyectonan di RESEMBID cual tambe ta ser financia via di e fondonan Europeo. Proyectonan actualmente andando, manera "Turning the Tide" ta financia pa RESEMBID, y ta sumamente importante pa enfrenta e retonan den desaroyo sostenibel y preservacion di nos ecologia.

Parke Arikok den pasado a conta cu financiamento di Union Europeo, y ta ilustra e diferencia positivo cu esaki por haci, mirando e importancia di FPNA pa Aruba.

Proyectonan manera esun di RESEMBID, of renobacion di Maria Convent y inversion den un facultad nobo di Universidad di Aruba ta dificil sin e tipo di cooperacionnan aki cu Aruba tin cu UE.