Turismo fuerte den 2024

ATA ta reconoce cu durante e ultimo añanan y durante varios gobernacion, hopi accion a tuma luga pero ta consciente cu mester bin cu cambionan mas agudo y grandi pa logra ehecucion di mas accion necesario, incluso algun "urgente", pa guia e desaroyo di turismo den un direccion responsabel y duradero aki na Aruba. Ta reconoce cu tin paso cu mester tuma pa remedia aspectonan cu durante añanan no a logra encamina debidamente.

Un ‘Aruba dushi pa biba y pa bishita’ ta un responsabilidad colectivo, di sector publico y priva y di e comunidad completo!

2024 a inclui multiple accion dirigi na e desaroyo duradero di turismo. Ademas den 2024 a conta cu continuidad di un demanda sumamente fuerte pa Aruba, cu a traduci su mes den entre otro crecemento record den entrada genera pa medio di turismo. No obstante preocupacionan di parti di e comunidad pa e presion cu e volumen di huesped ta pone riba Aruba, mester keda ta consciente cu e demanda fuerte aki no ta bin di mes y ta resultado di ‘hopi esfuerso’, di ATA, sector publico y priva. E demanda y desaroyo cu ta importante y vital pa nos tur! No mester “take it for granted” y mester realisa cu mester cuida esaki y cu e situacion por ta otro, principalmente considerando con sensitivo turismo ta. COVID a mustra nos esaki. Mester tuma accion necesario, teniendo cuenta cu sentimento di nos comunidad y di nos huespednan, mester proteha y cuida nos turismo! Esaki ta algo di nos tur!

Year to Date 2024

Te cu december 2024, Aruba a ricibi un total di 1,421,616 huesped “stayover”, esaki ta un crecemento di 12.8% compara te cu december 2023, unda a ricibi 1,260,402 huesped “stayover”. 

Ora ta yega na lider den mercado, te cu december 2024:

• 79.7% di e huespednan ta di Norte America;
• 4.9% ta di Europa;
• 12.8% ta di Latino America;
• 2.6% tabata procedente di otro parti di mundo.

ESTADISTICA CONFORME ACTUALISACION DEN E INDUSTRIA DI TURISMO:

VOLUMEN (“STAYOVER”) CU RESULTADO DI DISMINUICION DI 0.8% DEN DECEMBER 2024 COMPARA CU DECEMBER 2023
Conforme e demanda por bai mira tambe cu e aerolineanan lo sigui expande capacidad y asina permiti nos gara e demanda. Den december 2024, Aruba a ricibi un total di 128,240 huesped “stayover”, esaki ta un reduccion si compara cu december 2023, unda a ricibi 129,303 huesped “stayover”.

MERCADONAN Y CATEGORIANAN DI ACOMODACION

Den december 2024 a ricibi e siguiente cantidad di huesped stayover:

• 78.4% for di Norte America;
• 5.6% for di Europa;
• 13.1% for di Latino America;
• 2.8% procedente di otro parti di mundo.

E cantidad di huesped cu a hospeda segun categoria di acomodacion den december 2024:

• -2.8% di huesped a keda den hotelnan European Plan;
• -6.5% a keda den hotelnan All-Inclusive;
• -6.3% a keda den Timeshare;
• 7% a keda den otro tipo di acomodacion, incluyendo short-term vacation rentals (STVR).

SHORT-TERM VACATION RENTALS (STVR)

ATA tin acceso na un plataforma unda por wak e cantidad di cas, apartamento y villas cu ta uza como vacation rentals como tambe e prijs averahe pa anochi, e ocupacion y un calculacion di e entrada cu esaki ta genera. Den 2023, segun un estudio, ATA a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di luga di estadia cu no ta un hotel pero cu si ta disponibel na e turista cu ta keda na Aruba pa un corto tempo.
Si compara december 2024 cu december 2023 por wak cu e ocupacion averahe di e acomodacionnan aki a subi cu 0.8%, for di un averahe di 58.9% na december 2023 pa un averahe di 59.7% na december 2024.

Den caso di entrada, si compara december 2023 cu december 2024 por wak cu e categoria ta conta cu un reduccion den entrada.
Por tira un bista riba e ‘Statistical Monthly Report’ pa mas informacion.