Turismo creciendo na Aruba

Den juni 2023 Aruba a ricibi 100.549 bishitante “stay-over”. Si compara juni 2023 cu juni 2019, cu tabata e ultimo aña normal di turismo, por mira cu Aruba a recupera 102%, cu ta un crecemento di 2%. Comparando juni 2023 cu juni 2022, a recupera pa 99%, cu ta un caida di 1%.

Tourism Credits Q1 2023
Segun Banco Central, e ‘Tourism Credits’ pa e prome kwartaal di 2023 a contribui cu Awg. 1.3 biyon de nos economia cu ta 37% mas compara cu e mesun temporada na 2022.  A.T.A ta uza informacion di dos diferente tipo di tarheta cu ta mas uza pa nos bishitantenan. Visa Credit card ta mas uza bou di e bishitante Mericano cu un averahe maximo di $667 pa cada cardholder den prome kwartaal 2023. Mientras cu Mastercard ta bon uza pa e bishitante Europeo, cu un averahe maximo di $740 pa cada cardholder den Q1 2023.

Mercado y categoria di acomodacion
Den juni 2023, 82.1% di e total di e bishitantenan “stayover” a bishita for di Norte America mientras 4.5% a bishita for di Europa, 11% for di Latino America y 2.4% tabata procedente di otro parti di mundo. Na juni 2023, 27.2% di bishitante a keda den hotelnan European Plan, 18.3% a keda den hotelnan All-Inclusive, 28.9% a keda den Timeshare y 25.6% a keda den otro tipo di acomodacion, conoci como vacation rentals.

Vacation Rentals
Segun calculacion di ATA, e prijs averahe pa anochi, e ocupacion y un calculacion di e entrada cu vacation rentals ta genera, tambe a aumenta. Si compara juni 2023 ($260 pa anochi) cu juni 2022 ($219 pa anochi ) por wak cu e prijs averahe di e acomodacion aki a crece cu 10%. Si compara juni 2023 ($260 pa anochi) cu juni 2019 ($158 pa anochi) por wak cu e prijs averahe di e acomodacionnan aki a crece cu 66.5%. E ocupacion na vacation rentals na juni 2023, compara cu juni 2022, a cay cu 3.1%, for di un averahe di 50.6% na juni 2022 pa un averahe di 48.7% na juni 2023. Si compara juni 2023 (48.7%) cu juni 2019 (43.4%) por wak un crecemento di 5.9%.

Comparando juni 2023 cu juni 2022 por wak cu e vacation rentals a genera un crecemento den entrada di 33% y compara cu juni 2019 por wak un crecemento den entrada di 204% YTD.

Den e prome mita di 2023, Aruba a ricibi 610.582 bishitante stayover, cu ta un crecemento di 6.0%, compara cu mesun periodo den 2019, unda a ricibi 575.649 bishitante stayover. Comparando e prome mita di 2023 cu e prome mita di 2022, por wak un crecemento di 16%, di 528.325 pa 610.582 bishitante "stayover".

Aruba ta sigui como un di e top destinacionnan cu a recupera despues di e pandemia pero mester tene cuenta cu Aruba a strategicamente tuma e pasonan pa beneficia optimalmente di e hamber pa biaha durante y despues di e pandemia, un fenomeno temporal. Turismo ta sigui ta fuerte pa Aruba, y lo regresa na tendencianan normal despues di e efecto post-pandemia.