Trayecto di digitalisacion na Departamento di Impuesto

ORANJESTAD - Recientemente, Prome Minister Evelyn Wver-Croes y Minister di Finansa y Cultura Xiomara Maduro, a reuni cu Departamento di Impuesto (DIMP) hunto cu e compania Gravity IT cu ta yuda cu e trayecto di digitalisacion di DIMP y a repasa e cambionan atraves di e añanan cu a hiba cu awe basta proceso fiscal na Aruba ta digitalisa.

Trayecto di 2017 pa 2023:

  • Na 2017 a introduci e sistema di SAP na DIMP cu cual a cuminsa digitalisa e impuesto y primanan mensual;
  • despues a sigui cu e impuestonan di tur aña y e sistema automatisa di BO Impuesto (BOi) na aña 2019;
  • den aña 2019 tambe a aplica e cambionan pa haci e Reforma Fiscal I posible;
  • durante e pandemia den añanan 2020 y 2021, e sistema a mustra su balor tambe facilitando e Alivio Fiscal I y II na comunidad, y e "cross check" necesario pa facilita e trabou di SVB pa brinda Subsidio di Salario na comercio, na momento cu e contacto fisico tabata casi imposibel pa motibo di, por ehempel, e "shelter in place" aplica pa cuida e salud publico;
  • den aña 2022 a haci e preparacion necesario pa implementa e Reforma Fiscal II cu a resulta den e Plan di Impuesto 2023 na comienso di aña 2023;
  • den e mesun aña aki a introduci "BBO na frontera" y e resultado te awo ta mustra cu e implementacion tecnico tabata uno exitoso.

Den e tempo nos dilanti lo digitalisa mas proceso fiscal na DIMP pa asina por crea e eficiencia necessário, entre otro:

  • Ainda den aña 2023 ta e intencion pa introduci e posibilidad pa haci "bezwaar" online;
  • Den aña 2024 lo digitalisa e impuesto riba ganashi y impuesto riba dividendo;
  • Tambe lo traha riba e parti di seguridad electonico na e MFAnan. Entrante 2025 lo traha riba e integracion di DIMP cu e registronan importante manera Censo, Camara di Comercio, SVB, DOW, DLV y DIP;
  • Pa e tempo eynan tambe lo kier introduci e "feature" di "pay now" den Boi;
  • Lo traha tambe riba e uzo di "analytics" pa mehora cumplimento (compliance), lo contempla pa upgrade e sistema di SAP y bay over na e sistema di Cloud pa warda informacion.

Banda di e trabounan di digitalisacion, tin haciendo hopi trabou pa por mehora e servicio di DIMP na comuniddad. Recientemente DIMP a logra surpasa e retraso cu tabata existi 40 aña largo den procesa pago di restitucion di impuesto riba entrada. Den aña 2023 pa prome biaha ta logra paga restitucion di aña 2022 den apenas algun siman despues di a yena e aangifte. Ta trahando riba mehoracion di e sistema di telefon di DIMP cu ta den su fase final pa keda cla pa asina por brinda un miho servicio. Ta preparando tambe un "task force" pa atende cu e atraso den atende e cartanan di obhecion. Ta haciendo tur e trabaonan aki simultaneamente pa asina por mehora e servicio di DIMP na comunidad.

Gobierno ta gradici e ekipo di DIMP y tambe e compania Gravity IT pa tur e esfuerso cu ta haci pa e implementacion di e trayecto di digitalisacion na DIMP por tabata exitoso.

Foto