Tin oportunidad pa busca permiso pa campamento te cu diabierna 28 maart
ORANJESTAD - Relaciona cu temporada di Semana Santa, Altocomisario di Polis Ramon Arhem, ta haci un yamada na tur campado pa tene cuenta cu e condicionnan bao di cual ta otorga e permiso di campamento.
Esnan cu kier campa e aña aki tin e oportunidad ainda pa busca e peticion di permiso pa campamento, na e warda di polis na unda lo bay campa, te cu diabierna 28 maart 2025.
E fecha riba cual por cuminsa campa ta diadomingo 13 april 2025 pa 12:00 di merdia.
Kiermen riba e fecha y ora stipula ta permiti pa pone trailer- y tentnan banda di beach. Polis lo kita tur obheto cu pone prome cu e fecha y orario stipula.
E ultimo dia di campamento ta dia 27 april 2025.
Despues di campamento mester kita tur obheto for di beach. Si esaki NO sosode polis lo kita esakinan riba gasto di e campado.
Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic.