Tienda di Educacion cu directiva nobo pa sigui brinda guia y sosten

Nan a duna un presentacion di tur e servicionan cu nan ta ofrece, pero tambe nan vision pa futuro, caminda mas y mas nan lo bay enfoca riba plataformanan digital. Esaki pa brinda e guia y sosten na famianan y educadornan cu tambe ta hunga un rol importante den lantamento di mucha y hoben.

Ademas ta bay enfoca pa cambia e vision, caminda no ta solamente lo duna guia na individuonan pero tambe na henter e sistema. Esaki ta sincronisa cu e maneho di gobierno, cu algun luna atras a percura pa brinda curso na diferente profesional den e cadena social pa loke ta e sistema di “Multidimensionele Familietherapie”.

Tienda di Educacion ta traha cu diferente stakeholder den e cadena social, pa por brinda sosten na e cliente cu tin mester di esaki. Teniendo na cuenta cu educadornan tambe ta forma parti di e educacion y formacion di mucha y hoben na Aruba, nan lo concentra na duna guia y sosten na educadornan, pa di e forma aki nan tambe por sigui aporta positivamente na e desaroyo di nos mucha- y hobennan.

E no ta solamente brinda conseho, pero tambe brinda guia den e “hulpvraag” cu e individuo of famia tin, y nan ta keda monitor esaki, te ora cu e famia logra haya un solucion.