Pa algun esaki ta un bendicion, pa salud publico esaki por ta un peliger.

Yobida ta nifica bida y cu bida tambe e posibilidad pa sangura broei y ocasiona brote di malesanan transmiti pa sangura manera Dengue, Chikungunya y Zika. Pa evita posibel brote di un di e malesanan transmiti pa sangura manera a sosode den pasado, ta importante pa comunidad ta consciente di e proceso con sangura ta broei. Sangura mester awa pa por pone webo, cual despues di algun dia ta bira larva, pupa y finalmente e sangura ta nace. Eliminando tur baki den cual awa di yobida por para, ya ta elimina e proceso di broei y ta mantene e cantidad di sangura limita, pues menos posibilidad pa forma un brote.

Con nos por haci esaki? 

• Deshaci di tur obheto cu por retene awa paden y rond di cas, scol y trabou. Por ehempel scoter bou mata, taira, co'i hunga pafo, vaas cu mata of flor y mas;  
• tapa tur awa para cu tin proposito manera e.o, pa muha mata of duna bestia. Por ehempel hemchi bou airco of bari cu awa di yobida y mas. Sea extra alerta riba awa para cu proposito di bida pa mata of mascota por ehempel vaas cu mata of flor, baki awa di bestia, vijver cu mata di lili y mas.

Con pa evita di haya un di e malesanan transmiti pa sangura?

• Bisti paña cu manga y pia largo durante oranan di atardi pa anochi;
• uza repelente contra sangura riba cuero cu no ta cubri cu paña;
• pafo di cas, cende un mecha of uza bela contra sangura;
• cera porta y bentana di cas prome cu bira scur of uza screen;
• evita di bishita areanan unda bo sa cu tin hopi sangura;
• spuit paden di cas, camber, oficina y areanan cu bo ta frecuenta regularmente cu producto pa mata sangura.

Stop e contagio si abo ta malo y ta sospecha cu ta Dengue, Chikungunya of Zika.

E sintomanan ta entre otro:

• Keintura.
• Dolor di cabes. 
• Biramento di stoma y sacamento.
• Dolor di weso, joints y musculo.
• Dolor di wowo.
• Rash riba curpa.

Si bo tin un of mas sintoma, consulta bo dokter di cas.
Si bo persona ta sinti hopi molester di sangura, GKMB ta conseha pa haci un bon inspeccion rond di cas y elimina tur awa para. Si despues di haci inspeccion ainda e molester ta continua, por yama Gele Koorts en Muskieten Bestrijding (GKMB) na 5855533 pa informa.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw