Temporada di Campamento, ban cuida y proteha nos medio ambiente y recursonan natural.

DNM su apelacion ta bay na tur esnan cu a haya un vergunning pa campa na nos costanan pa cuida y proteha nos naturalesa y medio ambiente, door di tene liber di desperdicio. E temporada pa campa e aña aki ta cuminsa diadomingo 13 di april 2025 entrante 12:00’or di merdia y termina dia 27 di april 2025. 

Locual DNM kier pone atencion riba dje ta, cu e sitio di campamento ta e habitat pa matanan y bestianan. Esakinan ta cay bou di e clasificacion di ‘recursonan natural’. Esaki ta inclui e lama cu ta e habitat pa especienan marino.  

Mester menciona cu hende sa tin comportacion cu ta bay contra ley of, simplemente, indesea di trata naturalesa. Un ehempel ta, kita mata(nan) pa crea espacio pa pone tent of pa sombra.  

DNM ta recorda cu ta contra di ley pa:

• Kap, corta, tampoco destrui e matanan di mangel, specificamente esunnan cu ta den cercania di lama. Nan ta hopi importante pa proteccion di nos costanan;
• molestia especienan protegi manera tortuga di lama, shoco, strea di lama, coral, yerba di lama, bushi, cadushi y banana di rif;
• mishi cu e bestianan y kap of corta e matanan.

E permiso pa campamento ta regula pa Korps Politie Aruba (KPA) y tin condicionnan mara na esaki manera laga e luga limpi manera bo a hay’e. Den e regla y rekisitonan tin specificamente poni kico no mag y mayoria tin di haber cu leynan manera Algemene Politie Verordening (APV), Landsverordening en Landsbesluit Openbare Wateren en Stranden, Ordenansa pa Proteccion di Naturalesa y Decreto Nacional Flora y Fauna  (Natuurbeschermingsverordening  y Landsbesluit bescherming inheemse flora en fauna). E ultimo ta e ley di proteccion di diferente bestia y mata local. Tambe no por keda sin menciona e Landsbesluit Parke Marino, Landbesluit nieuwe aanwijzing domeingronden als natuur reservaat y e Landsbesluit Verbod voor het milieu schadelijke producten. Pa esun ultimo aki ta referi na e prohibicion di uzo di productonan di plastic di un solo uzo y tambe producto antisolar (crema of likido) cu e kimico oxybenzone cu ta afecta nos bida marino specificamente nos coralnan. Tur e leynan menciona ta obtenibel riba www.dnmaruba.org. 

Ta keda na cada individuo pa cuida y respeta e sitio cu ta e habitat pa matanan y especienan. Esaki mester sosode no solamente durante temporada di campamento y Semana Santa si no henter aña. 

Ta permiti pa disfruta di nos recursonan natural y pa laga nan den bon condicion. Asina e futuro generacion tambe por disfruta di nan. 

DNM ta urgi pa:

• no saca e strea di lama fo’i lama tampoco mishi cu nan paso nan ta sofoca y muri;
• no molestia tortuganan ora nan subi tera pa pone webo;
• no duna ningun bestia den naturalesa cuminda. E bestianan mes ta busca loke ta adecua pa nan come;
• tira tur sushedad den bari di sushi y no haci uzo di barinan cu ta yen. Hiba bo desperdicio bek cas y deshaci di esaki na un manera responsable;
• no haci uzo di blaasnan den aire liber, ya cu esaki por bula y caba den lama asina causando daño na e bida marino y naturalesa en general. Esaki tambe ta regla den e APV art.55A.

DNM ta desea un y tur un dushi temporada di campamento y ta confia cu nos campadornan ta bay cuida y proteha Aruba su recursonan natural y e medio ambiente.