Mirando e cantidad y variedad di vehiculo di motor riba caminda publico y pa garantisa orden den trafico, Gobierno a haya necesario pa institui un taskforce cu ta consisti di Departamento di Transporte Publico (DTP), Korps Politie Aruba (KPA), Dienst Technische Inspectie (DTI), Departamento di Impuesto (DIMP), Aruba Tourism Authority (ATA) y Ministerio Publico (OM).  

E taskforce mester garantisa e cumplimento di ley y reglamentonan aplicabel pa UTV, ATV, y otro tipo di vehiculo

di motor manera entre otro step electrico y Segways. Tambe lo percura pa un maneho (handhavingsbeleid) relaciona cu velocidad, keuringsbewijzen, recibo di pago, impuesto di vehiculo di motor, standard di conducta (gedragsnormen) y permiso/vergunning necesario di e vehiculonan di motor menciona. Esaki lo trece orden den trafico y limita e riesgo cu e vehiculonan aki ta trece cu ne manera accident, lesion y daño na otro. Ademas e taskforce lo enforsa control riba auto cu A-nummerplaat cu ta uza ilegalmente como vehiculo di huur.

E taskforce lo ehecuta un maneho eficaz y eficiente teniendo na cuenta cu e gran mayoria di e usuarionan di e vehiculonan aki ta turista, y lo aplica cu severidad amigabel.  

Na augustus lo inicia cu conscientisacion y lo tene sesion informativo cu stakeholders y despues cuminsa cu accion por medio di e "handhavingsbeleid" den forma di control, multa pa incumplimento cu ley y reglamento y si mester, hasta baha e vehiculo for di caminda publico.  

Ta duna oportunidad na doñonan di vehiculonan pa regla tur documento manera ley ta stipula.