Con cos ta bay na bo cas? Biblioteca ta lagabo cera conoci cu diferente autor di buki pa mucha y tambe ilustrador.

Tanchi Esmé a skirbi e buki pa mucha ‘Buchi Penchi malo’ y ta gusta conta storia.
Esmeralda a nace na Aruba, na aña 1959, a lanta y crece den e bario di Tanki Flip, caminda te awe e ta biba. E ta casa cu Howard Tromp y hunto nan tin dos yiu muher Richanella y Richelly. Esmeralda tin un titulo hopi importante y bunita, e ta Mama Dushi di un mucha homber, yama Max. Tanchi Esmé manera e ta conoci, for di un edad basta hoben tabatin e pasion pa traha cu mucha y den ramo di cuido di mucha. Aunke esaki nunca a concretisa, Esmeralda no a para keto y a traha diferente programa dedica na e mucha nan den bario di Tanki Flip y Tanki Leendert.

Esmeralda a contribui hunto cu algun otro mayor pa cuminsa cu e biblioteca

na scol Colegio Ora Ubao, ‘Biblioteca Nos Tesoro’. E no solamente a yuda cu esaki pero tambe a fungi como e asina yama ‘Bieb moeder’.

Conta storia pa mucha ta un placer pa Esmeralda.
Esmeralda tin 25 aña ta presenta su mesun programa di radio riba diadomingo dedica na tur mucha, ‘Mundo Infantil’. Ademas e ta produci hunto cu otro productornan un sin fin di shownan pa mucha cu sala nan completamente bendi.

Na aña 2021 Esmeralda a realisa un di su soñonan y ta lansa su prome buki. ‘Buki Penchi malo’ ta un fabula cu ta enfatisa e importancia pa evita di pensa pa haci maldad. Na Aruba nos ta referi cu ‘Buchi Penchi malo’ na un mucha cabesura, un mucha un poco mala mucha. “ ‘Buchi Penchi malo’ mi a dedice na prome luga na un sobrino dimi cu di berdad tabata un Buchi Penchi malo pero na caminda ela haya structura den su bida y na di dos lugar na henter mi famia, pasobra segun ami nan ta e fuente di mi amor pa mucha”. Algun di e mensahenan cu ta refleha den e buki ta, e importancia di solo pa nos humanidad, siña pordona, mustra afecto na otro y ta un bon hende pa comunidad.