Ta conmemora 160 aña di abolicion di sclavitud den colonia Antiano y na Surinam

Historia di sclavitud ta un tema cu ultimamente ta den discusion den Reino.
Dia 1 di juli 2023 ta conmemora 160 aña di abolicion di sclavitud door di Hulanda den ecolonianan di Antias Hulandes y Surinam. Sclavitud ta un negoshi cu a trece rikesa, pero tambe hopi tristesa cu a keda acumula durante e ultimo siglonan. Na Aruba e topico aki no tabata biba mucho den comunidad, no tabatin hopi informacion y na scol nunca a atende cu e topico aki na forma structural, apesar cu na Aruba tambe tabatin esclavo.

Sclavitud no tabata den e mesun extensidad y intensidad manera otro pais den Caribe, pero esaki no ta kita afo cu na Aruba tambe cosnan inhumano a tuma luga cu esclavonan. E cantidad di esclavo tabata menos en comparacion cu e otro islanan den Reino y Aruba tin su historia di sclavitud unico. Historia a demostra cu Aruba a conoce varios tipo di esclavo, e esclavo indjan, esclavo cora ‘rode slaven’ y tambe e esclavo transatlantico, procedente di Africa cu a yega Aruba via Corsou.

Na bispo di 1 di juli cu ta conmemora 160 aña di abolicion di sclavitud pero principalmente despues cu dia 19 di december 2022, estado Hulandes pa medio di Premier Rutte a ofrece un disculpa pa e historia di sclavitud na e paisnan den Reino y Surinam.

Premier Rutte a bisa cu no solamente nos ta comparti un pasado, pero tambe un futuro y pa e motibo ey e disculpa ofreci no ta un fin, pero un continuacion ‘we zetten vandaag een komma, geen punt’. Ta di suma importancia pa hunto como comunidad nos decifra kico lo mester sigui despues di e komma.

No mester crea solamente conscientisacion, pero tambe investiga kico ta e rasgo cu scalivitud tin den comunidad di Aruba, Bonaire, Corsou, Sint Maarten y Surinam. Tanto tempo a pasa pero ainda den pensamento di hende, den nan actuacion ainda e rasgo ta presente.

Desde aña pasa a sinta cu instancianan cu ta trata e topico aki. A institui un Comision Conscientisacion Sclavitud Aruba, un grupo di trabou cu ta consisti di miembronan di Ministerio di Cultura, Ministerio di Enseñansa y Archivo Nacional di Aruba, y como consehero sr. Luc Alofs.

Sr. Alofs ta un profesional cu a haci hopi investigacion riba e tereno di sclavitud y a skirbi bukinan tocante di sclavitud. Sr. Alofs pa algun aña caba ta participa den varios reunion encuanto sclavitud cu Hulanda y e paisnan Caribense como un ‘stakeholder’ di Aruba y ta sali na interes di Aruba encuanto e tema aki. Meta di e Comision CCSA ta pa conscientisa comunidad di Aruba tocante historia y abolicion di sclavitud na Aruba.

1 di juli 2023 ta conmemora 160 aña di abolicion di sclavitud door di Hulanda y gobierno di Aruba lo conmemora e fecha historico aki. Pa Gobierno ta importante pa brinda informacion di nos historia di sclavitud cu pa hopi no ta conoci ainda. Prome cu nos cuminsa cu e trayecto di guia pa yega na un trayecto di restaura, recupera y reconcilia nos mester conscientisa nos comunidad. E meta ta pa conscientisa, educa y informa comunidad di e historia y abolicion di sclavitud na Aruba.