Studiante: informa riba exigencianan di e pais caminda ta bay studia

Departamento di Salud Publico (DVG) ta recorda cada studiante cu ta importante pa ta na altura di tur exigencia di e pais corespondiente, school y campus na unda ta bay studia, pa evita cualkier inconveniencia. Un di e exigencianan hopi biaha ta cu e studiante mester tin e vacunacionnan basico entre otro DKTP, MMR y Hip-B cu ta duna na Wit Gele Kruis desde baby te cu 10 aña ora e mucha ta na scol basico.

Banda di e vacunanan aki, tin paisnan cu ta exigi e vacuna contra Meningitis y otronan contra Yellow Fever.

P’esey ta importante pa tur studiante busca informacion trempan y no laga esaki pa e ultimo dianan, pasobra tin vacuna cu ta duna den serie di mas cu un vacuna y mester tene cuenta cu e tempo necesario entre e vacunanan.

Studiantenan cu a perde nan prueba di vacunacion di tempo nan tawata mucha por yama Seccion di Cuido Salud Hubenil na 5224200 pa ricibi un copia y esnan cu mester vacuna di entre otro Meningitis, Yellow Fever of cualkier otro vacuna por tuma contacto cu Seccion di Malesanan Infeccioso na 5224200 pa mas informacion y un cita.

Pa mas informacion like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.