Stratix ta presenta e structura renoba pa frecuencianan 5G pa Aruba

E modelo aki, diseña pa stimula uzo y desaroyo economico den e epoca di 5G, a hala atencion di stakeholders for di varios sector. E conseho aki ta traha riba instruccion di Ministerio di Comunicacion y Directie Telecommunicatie.

E participantenan, consistiendo di representantenan di e sector di telecomunicacion, varios institucion gubernamental y no-gubernamental, manera APA, ATIA, ELMAR, WEB, AAA, KPA, Guarda Nos Costa, a ricibi un splicacion detaya riba e conseho desaroya pa Stratix. E modelo di compensacion proponi ta busca un balansa entre compensacion/cobransa husto pa e uzo y e stimulacion di inversionnan necesario den infrastructura manera antena y rednan.
E acercamento aki ta duna solucion pa responde na e desafionan di e sistema actual di compensacion di spectrum cu ta data di 2002 y cu no a cambia desde e tempo ey. E modelo aki ta haci'e caro pa proveedornan por implementa frecuencianan adicional pa logra velocidadnan mas halto y miho cobertura. Stratix ta subraya e importancia di un modelo cu por sostene innovacion y desaroyo den e mercado di telecom, cual lo conduci na internet mobil mas rapido.

Stratix ta propone un suma fiho como compensacion anual, independiente di e cantidad di spectrum cu ta uza. Esaki ta haci e modelo mas accesibel y inclusivo, motivando tanto proveedornan nobo como esnan existente pa maximalisa uzo di e spectrum y asina alcansa e maximo amplitud di celular y cobertura posibel, dentro di cuadro internacionalmente estableci.

A organisa e workshop pa promove un dialogo constructivo y consulta cu stakeholders prome cu tuma un decision. Nan reaccion y comentario ta di importancia critico y lo tuma nan na cuenta den un modelo nobo di compensacion. Esaki lo forma un paso fundamental den e formulacion di futuro maneho y conexion mobil na Aruba.