Specialista di Programa di Comunicacion y Informacion di UNESCO-Kingston a bishita Aruba

ORANJESTAD - Fin di september 2023, Paul Hector, coordinador di e programa Comunicacion y Informacion di UNESCO, a bishita Comision Nacional di UNESCO-Aruba.

Sr. Hector a topa cu Minister di Finansa y Cultura Xiomara Maduro, kende alabes ta presidente di UNESCO-Aruba.

Durante e reunion a discuti riba eventual cooperacion entre UNESCO-Kingston y e diferente instancianan na Aruba cu ta traha riba tereno di comunicacion y informacion. Den futuro por explora e areanan pa extende y reforsa e infrastuctura di Aruba riba nivel academico, sociedad civil, media, tecnologia digital y di hubentud.

E bishita di Sr. Hector na Aruba a coincidi cu Dia Internacional di UNESCO pa Acceso Universal nan Informacion. International Day for Universal Access to Information (IDUAI) di UNESCO, ta tuma luga tur aña riba 28 di september y ta yuda contribui na conscientisacion di e importancia di acceso na informacion como un derecho humano fundamental. E celebracion ta crucial pa empodera esnan cu ta traha riba nivel di comunicacion y informacion y pa logra un desaroyo duradero di un pais. Sr. Hector a participa como orador durante e lansamento di e website http://coleccion.aw ‘Coleccion Aruba’ cu ta un archivo digital cu ta contene mas di 80,000 records crea y administra pa Biblioteca Nacional di Aruba den colaboracion cu varios partners institucional na Aruba.

Preparacion pa e Siman di Media y Alfabetisacion di Informacion Global, cu UNESCO ta celebra di 24 te cu 31 di october cada aña, tabata otro punto importante riba agenda di Sr. Hector. Durante e siman di Global Media and Information Literacy (MIL) Week 2023, UNESCO-Aruba y partnernan a pone atencion na algun actividad nacional. MIL-Week ta pa conscientisa publico riba e habilidad y uzo responsabel di informacion y media. Esaki ta inclui pensamento critico, alfabetisacion digital y conocemento etico ora di evalua y crea acceso na informacion.

Durante su bishita, Sr. Hector tabata acompaña pa miembro nan di UNESCO-Aruba, incluyendo sra. Marushka Tromp, Secretario General, sra. Birgit Kreykenbohm, Specialista di Programa pa Comunicacion y Informacion, y sr. Peter Scholing, miembro y Presidente di Comite di Memoria di Mundo di UNESCO y Latinoamerica y Caribe (MoWLAC).

Pa mas informacion di e topiconan menciona den e articulo aki, por bishita e siguiente recursonan online:

Foto