Sin Tio Ali no tin festival

Ya pa hopi hopi aña caba Tio Ali, kende ta biba na Corsou, ta subi avion pa e por haci e muchanan di Aruba contento. Tur aña e muchanan/scolnan ta keda pidi pa Tio Ali. Y biblioteca ta cumpli. Asina ta, cu Tio Ali ta un ‘repeat guest’. Tio Ali ta trece un presentacion musical y ta pone muchanan canta, rima y baila. 

Tio Ali ta e nomber di e personahe cu Alvin Inecia a crea. Tio Ali a lanta den un tempo cu no tabatin television anto tur hende tabata conta cuenta. Y asina e ta gusta.

Tio Ali e aña aki ta celebra su di 30 aniversario como contado di cuenta y lo celebra esaki cu e muchanan di Aruba tambe. Tio Ali ta conta: “Danki na Richard Hooi cu a trece Poesia Ritmiko compaña cu instrumentonan rítmico na Corsou, Aruba, Boneiro, mi a discubri un forma di arte cu mi tambe kier a realisa. Como miembro di Grupo Orkesta Kultural mi tabata participa den e disciplina di Baile Folklorico, Comedia, Canto y tocamento di Tambu. Poesia Ritmico tambe a bira parti di e programacion di Grupo Orkesta Kultural. E lema di Tio Ali ta: “Entretene pa Educa.” y Tio Ali a bira un Sirbido di Educacion cu a haci Alvin Inecia receptor di hopi reconocimento. Manera e reconocimento cu aña tras aña Tio Ali ta ricibi di Biblioteca Nacional Aruba, na nomber di scol, docente y principalmente muchanan di Aruba, hunto cu aceptacion di coleganan autor di Aruba. Masha masha danki pa e reconocimento ey pa e trabou di Alvin Inecia como Tio Ali, cual mi ta keda haci cu puresa y hopi amor.“

Den e siman di dia 4 pa 8 di november hopi autor tanto di Aruba como for di, Boneiro, Corsou, Sint Maarten, Sint Eustatius y Hulanda ta bishita scol pa conta storia den klas y na biblioteca. Diferente ilustrador ta duna presentacion ta con nan ta ilustra storia pa mucha.

Un grupo grandi di escritor di buki pa mucha ta bishita mas cu 50 scol. Di Aruba esakinan ta: 

• Liliana Erasmus 
• Vanessa Paulina  
• Irmgard Frans 
• Emerita Emerencia 
• Ariana Koolman-Chirino 
• Gino Vrolijk 
• Robert Reeberg

Boneiro : 

• Segni Bernadina. 

Di Corsou ta yama bon bini na:

• Tio Ali 
• Mercee Doran 
• Crisen Schorea 

Hulanda: 

• Danielle Schothorst 
• Maria Karg 
• Sanne Rooseboom  

St. Eustatius:

• Misha Spanner (Contado di cuenta) 

St. Maarten: 

• Ralph Cantave

E grupo aki ta bishita scol pa conta storia, papia tocante buki cu mucha y tambe ta stimula mucha pa lesa mas.