Sesion informativo pa Brandweer
ORANJESTAD - Inversion continuo den Brandweer ta esencial pa su funcionamente optimal y pa por ricibi certificacion internacional relaciona cu siguridad na Aeropuerto.
Pa trata e tema aki y un varios otro topico di interes, recientemente un di dos sesion informativo reunion a tuma luga pa ekipo di Brandweer Aruba. Presente na e sesion informativo tabata e Minister di Husticia y Asunto Social sr. Rocco Tjon.
Recien a renoba e post di Brandweer na San Nicolas esta Post Sierra, e habri destaho pa post Oscar, cual ta situa na Aeropuerto pa cual a aloca cinco miyon florin pa henter e renobacion. Alabes, a cumpra cuater truck nobo como tambe tur material cu e e personal di Brandweer mester pa nan por eherce nan trabou na un manera mas sigur.
Ademas di inversion den ekipo y material, ta importante pa inverti den e organisacion, den e personal. Recientemente a recluta Mark van Akken pa un periodo di tres luna, hunto cu sindicato di bombero y e propio bomberonan, a traha riba un plan di mehoracion, enfocando riba tur aspecto manera personal, infrastructura, material, funcionnan cu mester yena mas lihe posibel.
Mientrastanto a recluta un comandante nobo, esta Johannes de Haas, pa por ehecuta e plan aki den e siguiente dos añanan.