Seguro di malesa y accidente

Seguro di malesa

Segun e ordenansa seguro di malesa un trahado haya parti di su salario den caso cu e no por traha pa motibo di malesa. Seguro di malesa ta percura pa e trahado cu ta malo ta haya un parti di su salario. E trahado den servicio cu ta ricibi un salario di Afl. 5.850,- of menos pa luna ta cay bao e seguro di malesa (e suma aki ta valido desde 1 di juli 2016 y por cambi’e pa ley).

E siguiente categorianan di trahado no ta cay bao e seguro di malesa:

• Doño di trabao cu ta traha pa su propio riesgo y cu ta ricibi pago.
• Casa, yiu(nan) of mayor(nan) di un doño di trabao cu ta traha den su propio compania y cu no ta ricibi pago of cu ta ricibi pago bao nivel di sueldo minimo.
• Personal domestico.
• Capitan of nabegante riba barco bao bandera di Aruba.
• Empleadonan publico of empleadonan cual nan status legal ta igual na empleadonan publico.
• Trahadonan cu ta traha na cas.

Compensacion pa dianan di AO

E asegurado tin derecho riba compensacion igual na 80% di su salario entrante e di cuater dia desde e notificacion di AO. SVb no ta paga compensacion pa e prome tres dianan di AO. Tur trahado tin derecho riba compensacion durante no mas cu dos aña pa e mesun causa di malesa. Ta cuminsa conta e periodo di 2 aña riba e dia cu e trahado notifica AO na SVb pa prome biaha cu e malesa en cuestion.

E trahado cu a haya un malesa a consecuencia di un conducta prohibi, un acto intencional of descuido serio di e trahado, no por bin na remarca pa ricibi compensacion.

Compensacion pa verlof di parto

Trahadonan femenino tin derecho riba compensacion di salario pa e dianan di verlof prome y despues di parto. Durante e verlof di parto e trahado femenino tin derecho riba un compensacion igual na 100% di su salario.
SVb ta compensa un verlof di maximo 12 siman. E trahado por parti e verlof entre 4 te 6 siman prome cu e parto, y e resto di e 12 siman despues di parto.

Prima seguro di malesa

SVb ta cobra un suma igual na 2.65% di e salario bruto di trahado pa e seguro di malesa. E prima aki ta keda contribui door di e doño di trabao.
Ta contra ley pa e trahado paga e prima, of pa e suma wordo reduci for di su salario.

Pa mas informacion por consulta Landsverordening Ziekteverzekering.(AB 1993 no. 24).

Seguro di accidente na trabao

Segun articulo 3 di Landsverordening ongevallenverzekering, e trahador cu a haya un accidente na pia di trabao tin derecho riba compensacion.

E trahado cu door di accidente di trabao a keda completamente of parcialmente incapacita pa traha, tin derecho riba compensacion yama compensacion di accidente di trabao, entrante e dia despues cu a notifica e accidente na SVb.