Seccion Cuido Salud Hubenil ta anuncia cu Campaña anual di vacunacion escolar ta bay cuminsa

E programa di vacunacion nacional ta maneha pa JGZ y ta cuminsa for di baby na consultorionan di Wit Gele Kruis unda dokternan di seccion JGZ ta controla desaroyo y ta vacuna muchanan te cu edad di 4 aña. Despues di 4 aña JGZ na scol preparatorio y basico ta monitor e mucha su desaroyo y skema di vacunacion.

E vacunanan cu JGZ ta provee na nos muchanan ta e vacunanan regular DKTP, MMR y Hep B y desde algun aña a introduci e vacuna di HPV. E vacuna di DKTP ta proteha contra malesanan
Difteria, Pertusis (Kinkhoest), Tetanus y Polio. E vacuna di MMR ta proteha contra e Sarampi, Cacheton y Sarampi Aleman. E vacuna di Hep B ta proteha contra Hepatitis B y e vacuna di HPV ta proteha contra Human Papillomavirus cu por causa cancer na boca di matris cerca e hende muhe den su adultes.
Cu exepcion di e vacuna di HPV, muchanan den scol basico a ricibi su prome dosis(nan) di e demas vacunanan, DTP, MMR y Hep B caba ora e tawata baby y na scol cu edad di 4 y 10 e booster, segun skema di vacunacion nacional.

Den e dianan cu a transcuri JGZ a manda un carta pa mayornan cu tin yiu den scol preparatorio of basico cu falta vacuna of mester ricibi un booster. E carta ta informa mayor di e vacuna cu e mucha mester ricibi y alabes ta pidi permiso di mayor pa e dokternan di JGZ y enfermeronan,
vacuna e mucha na scol. Ta pidi tur mayor cu a ricibi e carta aki pa firma esaki y entrega esaki mas pronto posibel na scol.

E programa di vacunacion escolar aki ta existi pa mas di 70 aña y ta danki na e grado halto di vacunacion bou di nos muchanan cu den e temponan aki nos no ta mira of presencia mas e malesanan cruel cu antes tawata costa bida di mucha of tawata laganan handicap pa bida largo manera entre otro Polio y Difteria. JGZ ta enfatisa cu nan no ta suministra vacuna di COVID.

Mayornan cu ta desea mas informacion por tuma contacto cu JGZ na 5224294.
Pa mas informacion like nos Facebook page Directie Volksgezondheid DVG Aruba,
Follow nos riba Instagram directie_volksgezondheid_aruba, subi nos website
www.dvg.aw, yama nos na 5224200 of mail nos na servicio@dvg.aw