Reunion cu directora di Ministerio di Asunto di Exterior di Hulanda; sector Westelijk Halfrond
ORANJESTAD - Dia 13 di februari 2025, Minister di Asunto Economico, Economia y Desaroyo Sostenibel demisionario Geoffrey Wever, a ricibi sra. Marjan Kamstra, directora di Westelijk Halfrond di Ministerio di Asunto di Exterior na Hulanda, y sra. Annemieke Verrijp, estableci na Corsou pa e islanan Hulandes.
Durante di e reunion a elabora riba diferente topico manera e maneho economico di Presidente Americano Donald Trump, relaciona cu e aumento di tarifanan di importacion y e impacto cu esaki por tin pa economia di Hulanda y e islanan di Caribe Hulandes.
Minister Geoffrey Wever hunto cu Departamento di Asunto Economico, Comercio y Industria, a haci un analisis macro economico pa por tin un bista mas amplio di e posibel consecuencianan cu esaki por tin pa e maneho aki na Aruba. Como cu e decisionan di Presidente Trump ta varia, lo keda monotoria esaki y haci analisis regularmente y purba pa ta un stap adelanta pa minimalisa e impacto y consecuencia cu esaki por tin pa Aruba, principalmente e efectonan inflatorio.
Temanan cu tambe a discuti ta e colaboracion entre Embahadanan di Reino den e region di America Latino y Caribe pa por ofrece informacion cu entre otro, comerciantenan local den respectivo mercadonan den region, por beneficia di dje.
Regularmente Reino ta organisa misionnan comercial den e region pa comerciantenan di Aruba y di e otro islanan di Caribe Hulandes por participa y asina sondia posiblidadnan comercial. Asina aki Minister Wever hunto cu un delegacion di DEACI, KVK, ATIA y comerciantenan local, a atende diferente mision comercial na entre otro Colombia, Hulanda, Surinam y recientemente na Panama.
Den luna di maart proximo Rijksdienst voor Ondernemend Nederland (RVO) lo ta na Aruba pa duna un presentacion combina cu un workshop riba e diferente posibilidad cu nan ta ofrece. Tambe lo elabora riba varios mision comercial cu lo organisa durante 2025.