Maneho di Gobierno ta dirgi riba turista di calidad cu ta gana mas di 150 mil dollar pa aña, y ta gasta hopi placa den nos economia. E entrada pa camber disponibel (Revenue per available room - REV PAR) den juni 2023 a keda rond di $223 compara cu juni 2022. Si midi e REV PAR den henter aña te cu awor y compara esaki cu 2022, por nota un crecemento di 28.2% cu un REV PAR di $288,75. Pa pone esaki den perspectiva na juni 2019 e REV PAR tabata $259.34 dollar pues un aumento di $29.

E REV PAR ta un indicador importante pa midi e calidad di turista cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Aruba mester ta contento di tin un di e REV PAR mas halto den Caribe. Un REV PAR asina halto ta indica cu turistanan di calidad ta yegando nos isla.

Otro indicador hopi importante ta e tarifa diario promedio (Average daily rate -ADR) cu tambe a conoce un aumento di 10.3% na juni 2023 den comparacion cu juni 2022. E ADR den juni 2023 tabata $305.97 compara cu $277.52 na juni 2022 y $232.96 na juni 2019.

Turismo ta keda e pilar principal di nos economia, y resultado di luna di juni ta confirma cu Aruba su turismo ta recuperando. Ora turismo ta prospera nos economia ta prospera y directo of indirectamente tur hende ta sinti e efectonan positivo di esaki.