Pa e database a uza un cantidad grandi di fuente di ANA manera: e registro di Emancipacion di 1863, lista di persona sclavisa, registro di nacemento y fayecimento di persona sclavisa, peticion y acta notarial cu informacion di benta y compra, traspaso y liberacion di persona sclavisa. E database ta obtenibel riba www.coleccion.aw/busca/person y aki por busca e fam cu un persona sclavisa a ricibi na final di e epoca di sclavitud. E database ta importante pa enseñansa y cultura den Aruba. Si bo ta busca informacion di un familiar cu tabata catibo entre aña 1840 y 1863 na Aruba por tira un bista den e documento “zoekhulp”. E documento aki ta fungi como guia y ta duna recomendacion ora di busca/haci investigacion.

Den e index aki bo persona por haya nomber di catibo durante di sclavitud, nomber y fam durante emancipacion, e genero, fecha di nacemento, nomber di mama, e profesion y religion. Tambe por haya informacion di doño (miho conoci como “shon”) y remarke di e fuentenan. Banda di esey, tin e sorto di acontecimento y e fecha di esaki. Manera a menciona anteriormente, e index ta consisti tambe di informacion di doño di catibo manera: nomber y fam, luga di residencia y remarke eventual di e fuentenan. Finalmente, tin nota di e fuente di referencia.

ANA hunto cu BNA y Archivo Nacional di Hulanda a crea un database nobo. E database ta resultado di e colaboracion entre Raymond Hernandez y Edric Croes di ANA, Peter Scholing di BNA y Coen van Galen di Radboud Universiteit Nijmegen (lider di proyecto di e database historico di Surinam y di Caribe, HDSC). Rosa Arends, Johny van Eerden (ANA) y Wouter Raaijmakers y Matthias Rosenbaum- Feldbrügge (HDSC) a encarga di ehecuta y transcribi e fuente nan primario.

Traduccion di e database y “zoekhulp” na Papiamento tabata den man di Natalia Rodriguez (ANA), Ray-Anne Hernandez (UNOCA) y Josephine Peterson (UNOCA). Pa agrega, ANA hunto cu BNA y UNOCA ta trahando hunto riba e plataforma Coleccion Aruba (www.coleccion.aw) den cooperacion cu otro instancia local y internacional pa asina pone mas fuente di e pasado di sclavitud online na disposicion di investigadonan y esnan interesa.

Di e manera aki Aruba a crea su propio producto innovativo a base di e dataset inicial cu tabata un colaboracion cu Hulanda. E prome version di e database ta solamente e comienso. Pa e database tin como meta pa sigui enrikece, crece y extrae mas informacion cu ta posibel. Mester resalta cu a haci e database disponibel na Papiamento tambe, pa asina hacie mas propio y parti di nos. Pa remarca, Peter Scholing (BNA) ta trahando riba e siguiente version di e data y di e database aki, entre otro door di conecta mas di e “missing links” na otro, pa asina e ta mas interesante y abundante tanto den su contenido como visualmente. Di e manera aki lo por extrae mas informacion, wak laso familiar entre e personanan y bay mas den detaye ora di busca un hende y nan famia. Pronto lo anuncia e version nobo y lo añadi esaki riba e portal di Coleccion Aruba.